Marg‘ilondagi Mustaqillik ko‘chasida joylashgan to‘rtta do‘konda yong‘in yuz berdi

Farg‘ona viloyati, Marg‘ilon shahar, Mustaqillik ko‘chasida joylashgan do‘konlarda yong‘in sodir bo‘ldi, deb xabar beradi FVV matbuot xizmat.

Ma’lumotlarga ko‘ra, 20-fevral kuni soat 05:50 da Marg‘ilon shahridagi Mustaqillik ko‘chasida joylashgan do‘konlarda yong‘in yuzaga kelganligi to‘g‘risida yong‘in-qutqaruv xizmatiga xabar kelib tushgan.

Voqea sodir bo‘lgan joyga zudlik bilan FVV viloyat boshqarmasining 3 ta yong‘in-qutqaruv ekipaji soat 05:54 da yetib borgan va soat 06:30 da yong‘in to‘liq o‘chirilgan. Hodisa oqibatida 4 ta do‘konning umumiy 90 kvadrat metr maydonida tom va ichki qismlari yongan. Harakatlar natijasida savdo do‘konlarining 200 kvadrat metr maydoni ofatdan saqlab qolingan.

Hozirda mutaxassislar tomonidan yong‘in sababi va yetkazilgan zarar miqdori aniqlanmoqda.

Ta’kidlanishicha, yong‘indan tan jarohati olganlar va halok bo‘lganlar yo‘q.

Avvalroq Jizzax shahridagi plastmassa quvurlar ishlab chiqaruvchi korxonada yong‘in sodir bo‘lgani to‘g‘risida xabar berilgandi.