Toshkentda obodonlashtirish tizimida ishlaydigan xotin-qizlarga 8-mart munosabati bayram sovg‘alari topshirildi. Bu haqda shahar hokimligi matbuot xizmati xabar bermoqda.
“Shahrimizning tozaligi va ko‘kalamzorlashtirishga mas’ul bo‘lgan 4 127 nafar munis ayollar va dilbar qizlarga 8-mart – Xalqaro xotin-qizlar kuni munosabati bilan Toshkent shahar hokimi nomidan bayram sovg‘alari topshirildi. E’tibor, ehtirom, gul va sovg‘alar ayollarga ko‘tarinki kayfiyat baxsh etdi”, — deyiladi hokimlik axborotida.
Bayram sovg‘alarini topshirish bilan bog‘liq tadbirlardan biri Xalqlar do‘stligi maydonida o‘tkazilgan bo‘lib, voqea joyidan olingan video Telegram’dagi ommabop kanallarda e’lon qilingan. Unda mas’ul shaxs obodonlashtirish tizimida ishlovchi xotin-qizlarga murojaat qilib, jumladan, shunday degan: “Hammangizni yaxshi ko‘ramiz”.
Mas’ulning qo‘shimcha qilishicha, obodonlashtirish tizimida mehnat qiluvchi xotin-qizlarga bayram munosabati bilan so‘nggi ikki yildan beri elektrchoynaklar sovg‘a qilingan bo‘lsa, bu yil shahar hokimi Jahongir Ortiqxo‘jayev nomidan dazmollar tuhfa etilgan.
Izoh (0)