“Daryo” koronadayjestida o‘tgan bir kecha-kunduz ichida dunyoda yuz bergan koronavirus bilan bog‘liq voqealar haqida ma’lumot berib o‘tamiz.
Koronavirusga qarshi emlangan dunyo yetakchilari
Venesuela prezidenti Nikolas Maduro Rossiyaning “Sputnik V” vaksinasi bilan koronavirusga qarshi emlandi. U rafiqasi Siliya Flores bilan dorining birinchi dozasini qabul qildi. Maduroning so‘zlariga ko‘ra, Venesueladagi tibbiy xodimlarning katta qismi “Sputnik V” bilan emlanib bo‘lgan. Mamlakatda Rossiya vaksinasini qo‘llagan holda emlash kampaniyasi 19-fevralda boshlangan, Maduro vaksina yetkazib berilgani uchun Vladimir Putinga minnatdorlik bildirgan edi. Venesuela prezidenti vaksina mamlakatning butun aholisi uchun bepul taqdim etilishiga va’da bergan, 2021-yilning ilk 90 kuni ichida 10 million kishi emlanishini ma’lum qilgan edi.Shuningdek, Tibet xalqining diniy yetakchisi Dalay-lama XIV ham Hindistonning Dxaramsala shahrida koronavirusga qarshi emlandi. U aynan qanday vaksina qabul qilgani noma’lum. Hindistonda ikkita vaksina — Oksfordning Covishield vaksinasining hindcha varianti hamda Hindistonning Bharat Biotech kompaniyasi tomonidan ishlab chiqilgan Covaxin ma’qullangan.
Pandemiya va karantinning ijtimoiy va siyosiy hayotga ta’siri
Yevrokomissiya 8-mart—Xalqaro xotin-qizlar bayrami arafasida koronavirus pandemiyasi ayollar huquqlariga salbiy ta’sir o‘tkazganini ma’lum qildi. Pandemiya ayollar va erkaklar o‘rtasidagi tengsizlikni kuchaytirgan. Xususan, Yevrokomissiya aniqlashicha, pandemiyada ishlagan sog‘liqni saqlash xodimlarining ko‘pchiligini ayollar tashkil qilgan, ammo virus tarqalishiga qarshi kurashish borasida barcha asosiy qarorlarni erkaklar qabul qilgan. Masalan, 87 ta mamlakatda, shu jumladan, Yevroittifoqqa a’zo 17 ta davlatda COVID-19 bo‘yicha maqsadli guruhlarning 85,2 foizini erkaklar boshqargan. Bundan tashqari, Yevroittifoqqa a’zo mamlakatlarda uyda ayollarga nisbatan zo‘ravonlik avj olgan. Chunonchi, Fransiyada lokdaunning birinchi haftasida uydagi zo‘ravonlik holatlari 32 foizga, Litvada ilk uch hafta ichida — 20 foizga o‘sgan.Avstriya va Germaniyada karantinga qarshi namoyishlar bo‘lib o‘tdi. Fuqarolar Yevropada koronavirusning uchinchi to‘lqini fonida hukumatlar tomonidan kuchaytirilgan karantin choralari susaytirilishini talab qildi. 6-mart, shanba kuni Vena markaziga yig‘ilgan bir necha yuzlab odamlar karantin choralari yumshatilishi bilan birga, kansler Sebastyan Kursning iste’foga chiqishini ham talab qildi. Politsiya namoyishchilarga qarshilik ko‘rsatmadi. Ayni vaqtda esa COVID-19’ga qarshi kurash bo‘yicha hukumat siyosati tarafdorlari bo‘lgan 200 ga yaqin odam Venada velomarafon uyushtirdi. Shu kuni Germaniyaning Saksoniya va Saksoniya-Anxalt federal shtatlarida ham karantin cheklovlariga qarshi ommaviy aksiyalar uyushtirildi. Xususan, 350 ga yaqin haydovchi avtomarafonlar tashkil qildi. Aksiya ishtirokchilari o‘z avtomobillariga koronavirusga qarshi emlash kampaniyasini tanqid qiluvchi shiorlarni ham osib oldi.
Finlyandiyada esa koronavirus bilan bog‘liq vaziyat yomonlashishi oqibatida munitsipal saylovlar apreldan iyunga ko‘chirildi. Mamlakatda koronavirusga chalinish holatlari bir kecha-kunduzda 648 taga ko‘payib, 61 552 taga yetdi. Jami 767 kishi vafot etgan. Shuningdek, mamlakatda koronavirusning yangi shtammlarini yuqtirish holatlari 1295 tani tashkil qilmoqda.
Boshqa yangiliklar
Rossiyada COVID-19’ga qarshi kurashgan 200 dan ortiq tibbiyot xodimi taqdirlandi. Vladimir Putin koronavirusga chalingan bemorlarni davolagan tibbiyot xodimlarini “Pirogov” ordeni va “Qrim Luqosi” medallari bilan taqdirladi. Ushbu orden va medal 2020-yilning iyulida ta’sis etilgan. Bundan tashqari, COVID-19’ga chalinganlar bilan ishlagan barcha rossiyalik tibbiyot xodimlariga qo‘shimcha to‘lovlar ham belgilangan. 2020-yilda 1,5 milliondan ortiq xodimlar shunday to‘lovlarni olishi kerak edi. Federal budjet buning uchun 230 milliard rubldan ortiq (3 milliard dollardan ziyod) mablag‘ sarfladi. Ba’zi hududlarda shifokorlar belgilangan to‘lovlarni qo‘lga kiritish uchun prokuraturaga murojaat qilishiga ham to‘g‘ri kelgan.AQShda olimlar Moderna va Pfizer/BioNTech vaksinalarining bitta dozasi COVID-19’dan himoya qilmasligi haqida ogohlantirdi. Bir qator amerikalik siyosatchilarning vaksinatsiya jarayonini tezlashtirish uchun COVID-vaksinaning bittadan dozasini kiritish taklifiga javoban, AQSh Sog‘liqni saqlash va ijtimoiy xizmatlar vazirligi qoshidagi Biologik tadqiqotlar markazi direktori Piter Marks bir marta emlash odamni virusdan uzoq vaqt himoya qilishi haqida dalillar yo‘qligini aytdi. Ta’kidlanishicha, Moderna vaksinasining ikkinchi dozasini birinchisidan keyin to‘rt hafta o‘tib, Pfizer/BioNTech bilan bog‘liq vaziyatda esa uch hafta o‘tib qabul qilish kerak.
Izoh (0)