«Дарё» коронадайжестида ўтган бир кеча-кундуз ичида дунёда юз берган коронавирус билан боғлиқ воқеалар ҳақида маълумот бериб ўтамиз.
Коронавирусга қарши эмланган дунё етакчилари
Венесуэла президенти Николас Мадуро Россиянинг «Спутник V» вакцинаси билан коронавирусга қарши эмланди. У рафиқаси Силия Флорес билан дорининг биринчи дозасини қабул қилди. Мадуронинг сўзларига кўра, Венесуэладаги тиббий ходимларнинг катта қисми «Спутник V» билан эмланиб бўлган. Мамлакатда Россия вакцинасини қўллаган ҳолда эмлаш кампанияси 19 февралда бошланган, Мадуро вакцина етказиб берилгани учун Владимир Путинга миннатдорлик билдирган эди. Венесуэла президенти вакцина мамлакатнинг бутун аҳолиси учун бепул тақдим этилишига ваъда берган, 2021 йилнинг илк 90 куни ичида 10 миллион киши эмланишини маълум қилган эди.Шунингдек, Тибет халқининг диний етакчиси Далай-лама XIV ҳам Ҳиндистоннинг Дхарамсала шаҳрида коронавирусга қарши эмланди. У айнан қандай вакцина қабул қилгани номаълум. Ҳиндистонда иккита вакцина — Оксфорднинг Covishield вакцинасининг ҳиндча варианти ҳамда Ҳиндистоннинг Bharat Biotech компанияси томонидан ишлаб чиқилган Covaxin маъқулланган.
Пандемия ва карантиннинг ижтимоий ва сиёсий ҳаётга таъсири
Еврокомиссия 8 март—Халқаро хотин-қизлар байрами арафасида коронавирус пандемияси аёллар ҳуқуқларига салбий таъсир ўтказганини маълум қилди. Пандемия аёллар ва эркаклар ўртасидаги тенгсизликни кучайтирган. Хусусан, Еврокомиссия аниқлашича, пандемияда ишлаган соғлиқни сақлаш ходимларининг кўпчилигини аёллар ташкил қилган, аммо вирус тарқалишига қарши курашиш борасида барча асосий қарорларни эркаклар қабул қилган. Масалан, 87 та мамлакатда, шу жумладан, Евроиттифоққа аъзо 17 та давлатда COVID-19 бўйича мақсадли гуруҳларнинг 85,2 фоизини эркаклар бошқарган. Бундан ташқари, Евроиттифоққа аъзо мамлакатларда уйда аёлларга нисбатан зўравонлик авж олган. Чунончи, Францияда локдауннинг биринчи ҳафтасида уйдаги зўравонлик ҳолатлари 32 фоизга, Литвада илк уч ҳафта ичида — 20 фоизга ўсган.Австрия ва Германияда карантинга қарши намойишлар бўлиб ўтди. Фуқаролар Европада коронавируснинг учинчи тўлқини фонида ҳукуматлар томонидан кучайтирилган карантин чоралари сусайтирилишини талаб қилди. 6 март, шанба куни Вена марказига йиғилган бир неча юзлаб одамлар карантин чоралари юмшатилиши билан бирга, канцлер Себастьян Курснинг истеъфога чиқишини ҳам талаб қилди. Полиция намойишчиларга қаршилик кўрсатмади. Айни вақтда эса COVID-19’га қарши кураш бўйича ҳукумат сиёсати тарафдорлари бўлган 200 га яқин одам Венада веломарафон уюштирди. Шу куни Германиянинг Саксония ва Саксония-Анхальт федерал штатларида ҳам карантин чекловларига қарши оммавий акциялар уюштирилди. Хусусан, 350 га яқин ҳайдовчи автомарафонлар ташкил қилди. Акция иштирокчилари ўз автомобилларига коронавирусга қарши эмлаш кампаниясини танқид қилувчи шиорларни ҳам осиб олди.
Финляндияда эса коронавирус билан боғлиқ вазият ёмонлашиши оқибатида муниципал сайловлар апрелдан июнга кўчирилди. Мамлакатда коронавирусга чалиниш ҳолатлари бир кеча-кундузда 648 тага кўпайиб, 61 552 тага етди. Жами 767 киши вафот этган. Шунингдек, мамлакатда коронавируснинг янги штаммларини юқтириш ҳолатлари 1295 тани ташкил қилмоқда.
Бошқа янгиликлар
Россияда COVID-19’га қарши курашган 200 дан ортиқ тиббиёт ходими тақдирланди. Владимир Путин коронавирусга чалинган беморларни даволаган тиббиёт ходимларини «Пирогов» ордени ва «Қрим Луқоси» медаллари билан тақдирлади. Ушбу орден ва медал 2020 йилнинг июлида таъсис этилган. Бундан ташқари, COVID-19’га чалинганлар билан ишлаган барча россиялик тиббиёт ходимларига қўшимча тўловлар ҳам белгиланган. 2020 йилда 1,5 миллиондан ортиқ ходимлар шундай тўловларни олиши керак эди. Федерал бюджет бунинг учун 230 миллиард рублдан ортиқ (3 миллиард доллардан зиёд) маблағ сарфлади. Баъзи ҳудудларда шифокорлар белгиланган тўловларни қўлга киритиш учун прокуратурага мурожаат қилишига ҳам тўғри келган.АҚШда олимлар Moderna ва Pfizer/BioNTech вакциналарининг битта дозаси COVID-19’дан ҳимоя қилмаслиги ҳақида огоҳлантирди. Бир қатор америкалик сиёсатчиларнинг вакцинация жараёнини тезлаштириш учун COVID-вакцинанинг биттадан дозасини киритиш таклифига жавобан, АҚШ Соғлиқни сақлаш ва ижтимоий хизматлар вазирлиги қошидаги Биологик тадқиқотлар маркази директори Питер Маркс бир марта эмлаш одамни вирусдан узоқ вақт ҳимоя қилиши ҳақида далиллар йўқлигини айтди. Таъкидланишича, Moderna вакцинасининг иккинчи дозасини биринчисидан кейин тўрт ҳафта ўтиб, Pfizer/BioNTech билан боғлиқ вазиятда эса уч ҳафта ўтиб қабул қилиш керак.
Изоҳ (0)