AQShdagi 20 mingdan ziyod xususiy kompaniyalar va davlat tuzilmalari, shuningdek, Yevropa va Osiyodagi o‘nlab tashkilotlar Microsoft kompaniyasi tomonidan ishlab chiqilgan, xabarnomalar almashinuvini ta’minlovchi Exchange Server dasturi tufayli xakerlar hujumiga uchradi. Bu haqda AQSh hukumatining axborotiga ega bo‘lgan manbaga asoslanib, Reuters agentligi xabar tarqatgan.
Xakerlar tashkilotlar foydalanadigan pochta serverlariga kirishga muvaffaq bo‘lgan. Ular holatlarning 10 foiz qismida Exchange Server dasturidagi zaiflikdan serverlarga qayta kirish va tarmoqni zararlashda foydalangan.
Hujumlar bir nechta maqsadlarni ko‘zlagan holda 2020-yil oxirida boshlangan va 2021-yil fevral oyida keng miqyosdagi kiberhujum kampaniyasiga aylanib ketgan. AQShda bu borada tergov ishlari boshlangan va uning ishtirokchilaridan biri hujumlardan keyin AQShdagi shahar ma’muriyatlari va kichik biznes vakillarining kredit ittifoqlari tizimlarini hanuzgacha masofadan boshqarish imkoniyati saqlanib turganini bildirgan.
2-mart kuni Microsoft dasturni favqulodda yangilagan, biroq 5-mart holatiga ko‘ra yangilangan nusxani hujumga uchragan qurilmalarning bor-yo‘g‘i 10 foiz qismi yuklab olgan. AQSh hukumati hujumning qurboni bo‘lgan tashkilotlarning aniq sonini bilmoqchi va bu borada kompaniya mijozlarni qo‘llab-quvvatlash xizmati bilan bog‘lanadi.
O‘z navbatida Microsoft dastlabki hujumlar ortida Xitoy hukumati bilan aloqador xakerlar turibdi deb hisoblamoqda. Xitoy hukumati sodir bo‘lgan voqealarga aloqasi borligini inkor etgan.
2020-yil dekabr oyida AQSh davlat idoralariga SolarWinds kompaniyasining dasturiy ta’minoti orqali ko‘plab kiberhujumlar uyushtirilgani haqida xabarlar tarqalgandi. Jumladan, AQSh davlat departamenti, Moliya vazirligi, savdo, energetika va Pentagonning muayyan qismi hujumga uchragandi. The Washington Post bergan ma’lumotlarga ko‘ra, hujumlar ortida Rossiya maxsus xizmatlari, Federal xavfsizlik xizmati va Harbiy razvedka xizmatiga aloqadorligi gumon qilinadigan Cozy Bear (APT29 nomi bilan ham mashhur) guruhi turibdi. Moskva rasmiylari mazkur xakerlik hujumiga aloqador emasligini bir necha marta ta’kidlagan.
Izoh (0)