Buyuk Britaniyada 1984-yilda ishlab chiqarilgan Toyota Corolla Levin AE86 39 995 funt sterling qiymatida sotuvga qo‘yildi. Modelning bu kabi yuqori narxi avtomobilning ideal darajadagi holati hamda ikki eshikli mashina drift ixlosmandlari uchun noyobligi bilan izohlanmoqda, deb xabar beradi Motor.
Toyota Corolla Levin (shuningdek, Corolla AE nomi bilan ham mashhur) 1983-yildan 2000-yilga qadar Yaponiyada ishlab chiqarilgan. Ajoyib boshqaruvchanlikka ega orqa uzatmali yengil kupe va xetchbeklar drift ixlosmandlari orasida tezda mashhurlikka erishgan. Yaponiyadagi ko‘cha poygalari ishqibozlari birinchi avlod Corolla AE’ni “drift qirolichasi” deb atagan va modelga “Xachiroku” degan nomni bergan, yaponchada bu “86” degani.
Sotuvga qo‘yilgan nusxa ideal holatda saqlangan. Sotuvchining so‘zlariga ko‘ra, 37 yillik Corolla’ning original tashqi ko‘rinishi, jumladan, kuzovidagi kanonik oq-qora chizgilar ham original saqlangan. Ikki eshikli mashina interyeri ham xuddi zavoddan chiqqan holatdagidek. GT Apex uslubidagi Toyota saloni klassik model uchun qizil-qora ranglarda ishlangan va Pioneer magnitolasidan tashqari hech qanday modifikatsiya amalga oshirilmagan.
Orqa uzatmali Corolla 130 ot kuchiga ega to‘rt silindrli 1,6 dvigatel yordamida harakatga keladi. Agregat besh pog‘onali mexanik uzatmalar qutisi yordamida boshqariladi. Mashina hozirga qadar 24 ming kilometr yo‘l bosgan bo‘lib, uni 39 995 funt sterlingga (55 ming AQSh dollar) xarid qilish mumkin.
Avvalroq Xitoyda Lada Granta’dan arzonroq uch g‘ildirakli avtouy sotuvga qo‘yilgani, shuningdek, AQShda 30 yil garajda harakatsiz turgan mashhur Ford Thunderbird maslkarlari 2,5 ming dollardan sotilayotgani to‘g‘risida xabar berilgandi.
Izoh (0)