Буюк Британияда 1984 йилда ишлаб чиқарилган Toyota Corolla Levin AE86 39 995 фунт стерлинг қийматида сотувга қўйилди. Моделнинг бу каби юқори нархи автомобилнинг идеал даражадаги ҳолати ҳамда икки эшикли машина дрифт ихлосмандлари учун ноёблиги билан изоҳланмоқда, деб хабар беради Motor.
Toyota Corolla Levin AE86 (шунингдек, Corolla AE номи билан ҳам машҳур) 1983 йилдан 2000 йилга қадар Японияда ишлаб чиқарилган. Ажойиб бошқарувчанликка эга орқа узатмали енгил купе ва хетчбеклар дрифт ихлосмандлари орасида тезда машҳурликка эришган. Япониядаги кўча пойгалари ишқибозлари биринчи авлод Corolla AE’ни «дрифт қироличаси» деб атаган ва моделга «Хачироку» деган номни берган, япончада бу «86» дегани.
Сотувга қўйилган нусха идеал ҳолатда сақланган. Сотувчининг сўзларига кўра, 37 йиллик Corolla’нинг оригинал ташқи кўриниши, жумладан, кузовидаги каноник оқ-қора чизгилар ҳам оригинал сақланган. Икки эшикли машина интерьери ҳам худди заводдан чиққан ҳолатдагидек. GT Apex услубидаги Toyota салони классик модель учун қизил-қора рангларда ишланган ва Pioneer магнитоласидан ташқари ҳеч қандай модификация амалга оширилмаган.
Орқа узатмали Corolla 130 от кучига эга тўрт цилиндрли 1,6 двигатель ёрдамида ҳаракатга келади. Агрегат беш поғонали механик узатмалар қутиси ёрдамида бошқарилади. Машина ҳозирга қадар 24 минг километр йўл босган бўлиб, уни 39 995 фунт стерлингга (55 минг АҚШ доллар) харид қилиш мумкин.
Аввалроқ Хитойда Lada Granta’дан арзонроқ уч ғилдиракли автоуй сотувга қўйилгани, шунингдек, АҚШда 30 йил гаражда ҳаракатсиз турган машҳур Ford Thunderbird маслкарлари 2,5 минг доллардан сотилаётгани тўғрисида хабар берилганди.
Изоҳ (0)