Toshkentda “Siroj solih” jome masjidi ochildi (foto)

Toshkentning Olmazor tumanida 3-mart kuni yangidan qurib bitkazilgan “Siroj solih” jome masjidining ochilish marosimi bo‘lib o‘tdi, deb xabar bermoqda O‘zbekiston musulmonlari idorasi matbuot xizmati.

Unda O‘zbekiston musulmonlari idorasi raisi, muftiy Usmonxon Alimov, Din ishlari bo‘yicha qo‘mita raisi Abdug‘ofur Ahmedov, ulamolar va namozxonlar ishtirok etgan.

Qayd etilishicha, 2000 metr kvadrat maydonida qurilgan masjid loyihasi o‘ziga xosligi, milliy va zamonaviy masjidlarning uslublarini o‘zida aks ettirgani bilan boshqa jomelardan ajralib turadi. Xonaqoh va pastki qism jami 4000 namozxonni sig‘dirishga mo‘ljallangan. Shuningdek, ayollar uchun alohida tahoratxona va namozxona o‘rin olgan.

Asosiy xonaqoh yerto‘la qismi bilan hisoblanganda uch qavatdan iborat bo‘lib, namozxonlar yilning har bir faslida yuqori darajadagi shart-sharoitlarni taqdim eta oladi. Masjid tarkibidan, shuningdek, anjumanlar zali, veb-sayt faoliyati uchun alohida videostudiya o‘rin olgan.

Ma’lumot uchun, “Siroj solih” jome masjidi 1990-yillarda sobiq sho‘rolar davridagi qatag‘on siyosati oqibatida o‘z yurtidan chiqib ketishga majbur bo‘lgan Sirojiddin Solih ismli shaxs vasiyatiga binoan u kishining mablag‘lari hisobidan qurilgan. Mustaqillik yillaridan to 1996-yilgacha mahalliy masjid bo‘lgan, 1996-yildan boshlab jome maqomida faoliyatini boshlagan. 2009-yilda masjid ta’mirlangan.

Masjid jamoati sezilarli darajada ortib, xonaqoh torlik qilayotgan, binosi ta’mirtalab holga kelib qolgani sababli masjidni qayta qurish taklifini ilgari surilgan. Ushbu tashabbus mutasaddi tashkilotlar tomonidan qo‘llab-quvvatlangach, 2019-yilning yanvar oyida masjidda qayta qurish ishlari boshlangan. 2019-yilning 29-mayida O‘zbekiston musulmonlari idorasi raisi, muftiy Usmonxon Alimov “Siroj Solih” jome masjidi yangi binosining birinchi g‘ishtini qo‘ygandi.

2020-yilning 8-fevralida qurilishi tugallanmagan ushbu jome masjidining ichki va shift qismi 60 metr kvadrat maydonida yong‘in sodir bo‘lgandi. Yong‘in qurilish obyektida payvandlash ishlari olib borish jarayonida yong‘in xavfsizligi qoidalariga rioya qilmaslik oqibatida kelib chiqqan.