Тошкентнинг Олмазор туманида 3 март куни янгидан қуриб битказилган «Сирож солиҳ» жоме масжидининг очилиш маросими бўлиб ўтди, деб хабар бермоқда Ўзбекистон мусулмонлари идораси матбуот хизмати.
Унда Ўзбекистон мусулмонлари идораси раиси, муфтий Усмонхон Алимов, Дин ишлари бўйича қўмита раиси Абдуғофур Аҳмедов, уламолар ва намозхонлар иштирок этган.
Қайд этилишича, 2000 метр квадрат майдонида қурилган масжид лойиҳаси ўзига хослиги, миллий ва замонавий масжидларнинг услубларини ўзида акс эттиргани билан бошқа жомелардан ажралиб туради. Хонақоҳ ва пастки қисм жами 4000 намозхонни сиғдиришга мўлжалланган. Шунингдек, аёллар учун алоҳида таҳоратхона ва намозхона ўрин олган.
Асосий хонақоҳ ертўла қисми билан ҳисобланганда уч қаватдан иборат бўлиб, намозхонлар йилнинг ҳар бир фаслида юқори даражадаги шарт-шароитларни тақдим эта олади. Масжид таркибидан, шунингдек, анжуманлар зали, веб-сайт фаолияти учун алоҳида видеостудия ўрин олган.
Маълумот учун, «Сирож солиҳ» жоме масжиди 1990 йилларда собиқ шўролар давридаги қатағон сиёсати оқибатида ўз юртидан чиқиб кетишга мажбур бўлган Сирожиддин Солиҳ исмли шахс васиятига биноан у кишининг маблағлари ҳисобидан қурилган. Мустақиллик йилларидан то 1996 йилгача маҳаллий масжид бўлган, 1996 йилдан бошлаб жоме мақомида фаолиятини бошлаган. 2009 йилда масжид таъмирланган.
Масжид жамоати сезиларли даражада ортиб, хонақоҳ торлик қилаётган, биноси таъмирталаб ҳолга келиб қолгани сабабли масжидни қайта қуриш таклифини илгари сурилган. Ушбу ташаббус мутасадди ташкилотлар томонидан қўллаб-қувватлангач, 2019 йилнинг январь ойида масжидда қайта қуриш ишлари бошланган. 2019 йилнинг 29 майида Ўзбекистон мусулмонлари идораси раиси, муфтий Усмонхон Алимов «Сирож Солиҳ» жоме масжиди янги биносининг биринчи ғиштини қўйганди.
2020 йилнинг 8 февралида қурилиши тугалланмаган ушбу жоме масжидининг ички ва шифт қисми 60 метр квадрат майдонида ёнғин содир бўлганди. Ёнғин қурилиш объектида пайвандлаш ишлари олиб бориш жараёнида ёнғин хавфсизлиги қоидаларига риоя қилмаслик оқибатида келиб чиққан.
Мавзуга доир: Ўзбекистонда масжидлар сони 2084 тага етди
Изоҳ (0)