Namangan shahri tarkibida yana bir tuman tashkil etiladigan bo‘ldi

Namangan shahri tarkibida yana bir tuman — Yangi Namangan tumani tashkil etiladi. Bu haqda xalq deputatlari viloyat kengashining bugun bo‘lib o‘tgan navbatdagi sessiyasida so‘z bordi, deya xabar beradi “Daryo” muxbiri Azizbek Abduvaliyev.

Sessiya kun tartibiga xalq deputatlari Namangan shahar kengashining joriy yil 4-martdagi viloyat markazidagi ayrim fuqarolar yig‘inlari hududlarini yangi tashkil etilayotgan Yangi Namangan tumaniga o‘tkazish haqida qarorini tasdiqlash masalasi kiritildi.

Sessiyada ma’ruza qilgan viloyat hokimining o‘rinbosari Saidahmad Sultonovga ko‘ra, viloyat hududida boshqaruvni tizimli yo‘lga qo‘yish, aholi uchun ijtimoiy va maishiy qulayliklar yaratish hamda Namangan shahrini ijtimoiy-iqtisodiy rivojlantirish uchun shunday taklif kiritilmoqda.

Yangi tashkil etilayotgan tumanning umumiy yer maydoni 8223 gektarni tashkil etadi. Tarkibiga shahardagi 24 ta mahalla hududini o‘tkazish ko‘zda tutilmoqda. Ushbu mahallalarda bugungi kunda 145 ming kishi istiqomat qilmoqda.

Ular qatorida Prezidentning Namanganga tashrifi davomida ko‘zdan kechirilgan va holati tanqid ostiga olingan “Bunyodkor” mahallasi ham bor.

Sessiyada ta’kidlanishicha, Yangi Namangan tumani tashkil qilinishi munosabati bilan alohida dastur ishlab chiqiladi. Mavjud “Paxtalikko‘l” kichik sanoat zonasidan tashqari yana uchta — “Yoshlik”, “Mashad” va “Bunyodkor” kichik sanoat zonalari tashkil etiladi. Ularda umumiy qiymati 245 milliard so‘mlik 60 dan ortiq loyiha amalga oshirilishi hisobiga 2600 ta yangi ish o‘rinlari yaratiladi.

Deputatlar Namangan shahri tarkibida yangi tumanni tashkil etish haqidagi qarorni ma’qulladi. Endi bu taklif ko‘rib chiqish uchun Oliy Majlisga yuboriladi. Parlament palatalari roziligi olinganidan so‘ng esa xalq deputatlari viloyat kengashi sessiyasi muhokamasiga kiritiladi.

Eslatib o‘tamiz, Prezidentning 2020-yil 26—27-iyun kunlari Namangan viloyatiga tashrifi davomida Namangan shahri tarkibida Davlatobod tumanini qayta tashkil etish yuzasidan taklif bildirilgandi. Mazkur masala xalq deputatlari Namangan shahar va viloyat kengashlari sessiyalarida ko‘rib chiqilib, davlat rahbarining tashabbusi ma’qullangan.

Oliy Majlis Senatining 2020-yil 11-sentabrdagi “Namangan viloyatining Namangan shahri tarkibida Davlatobod tumanini tashkil etish to‘g‘risida”gi qarori bilan yangi tumanga asos solingandi.