“Rahbarni ishdan olish uchun menda yetarli faktorlar bo‘lgan”. Alisher Sa’dullayev agentlikning Qashqadaryodagi mas’uli yo‘l qo‘yayotgan xatolarga nega ko‘z yumayotgani sababini aytdi

Yoshlar ishlari agentligi direktori Alisher Sa’dullayev agentlikning Qashqadaryo viloyatidagi mas’uli, boshqarma boshlig‘i Shohjahon Omonovni ishdan bo‘shatish uchun yetarli faktorlarga ega bo‘lganini, biroq unga imkoniyat berayotganini ma’lum qildi. Bu haqda agentlikning viloyat boshqarmasida bo‘lib o‘tgan matbuot anjumanida aytildi, deya xabar berdi “Daryo” muxbiri.

Ta’kidlanishicha, agentlikning viloyat boshqarmasi tashabbusi bilan 5-mart kuni press-tur tashkil etilgan. Press-tur yakunida agentlik direktori Alisher Sa’dullayev, viloyat hokimi o‘rinbosari Rustam Yo‘ldoshev hamda agentlikning viloyatdagi mas’uli Shohjahon Omonovlar juranalist va blogerlarni qiziqtirgan savollarga javob bergan.

Matbuot anjumanida so‘z olgan Alisher Sa’dullayev “Daryo” muxbirining “Agentlikning Qashqadaryo viloyatidagi mas’ullari OAVlar uchun yopiqligi va qilayotgan ishlari sabab jurnalist va blogerlar orasida, jamoatchilik o‘rtasida salbiy qiyofada gavdalanadi va har doim salbiy munosabat bilan tilga olinadi? Xo‘sh, agentlikning viloyatlardagi barcha mas’ullari xuddi Qashqadaryodagi vakillari singari salbiy imij yaratganmi? Yoki faqat Qashqadaryoda shundaymi?”, degan savoliga Qashqadaryoda holat haqiqatan ham yomonligini ta’kidladi.

“Agentlikning Qashqadaryo viloyatidagi rahbarining imiji haqiqatan ham past. Boisi viloyatdagi vakilimiz, birinchidan, diplomatiyani yo‘lga qo‘yolmagan. Ikkinchidan, faoliyati juda sust. Uchinchidan, rahbarni ishdan olib tashlash uchun menda yetarli faktorlar bo‘lgan, lekin unga imkoniyat berishga qaror qilganman. Balki uni bugun ishdan olib tashlarman, balki ertaga yoki indinga. Lekin ishdan olib tashlash oson. Bunga bitta buyruq yetarli. Ammo uni tarbiyalash, xatolaridan xulosa chiqarishga imkoniyat berish ham kerak. Shu nuqtayi nazardan biz Shohjahon Omonovga imkoniyat berdik. Boshqa viloyatdagi rahbarlarimizning ish faoliyati bunday emas. Ular ishga butun borlig‘ini bag‘ishlagan. Shohjahon Omonov ham harakat qilyapti. Ammo ish tajribasi yetmayaptimi yoki jamoatchilik bilan ochiq ishlashga moslashib ketolmayaptimi, hozircha o‘xshamayapti”, — dedi Alisher Sa’dullayev.

Agentlik direktori viloyatdagi vakilining ijtimoiy tarmoqlardagi tanqidiy chiqishlarga ham o‘z vaqtida munosabat bildirmasligini tanqid qildi.

“Shaxsan o‘zim agentlik direktori etib tayinlangan kunim Facebook’da post qoldirganman va barchaning fikrini o‘rganganman. Hozir ham har bir blogerning biz haqimizda yozayotgan postlarini diqqat bilan o‘qiyman. Shu menga qiziq. Hatto izohlarini ham birma-bir o‘qib, munosabat bildiraman. O‘sha paytda nega Shohjahon Omonov shu fikrlarga, tanqidiy chiqishlarga firk bildirmayapti deb o‘ylayman. Balki u o‘sha firklarni kuzatar, ammo fikr bildirib, xatosi bo‘lsa, uni tan olib, tuzatishga kirishinini aytishi va izoh qoldirishi kerak”, — dedi Alisher Sa’dullayev.

Alisher Sa’dullayev, shuningdek, jurnalist va blogerlar bilan muloqotda agentlikning viloyat boshqarmasi faoliyatiga oid xato-kamchiliklarni eshitib, izza bo‘layotganini ta’kidladi.

“Hozir bu yerdagi muammolar va masalalarni eshitib, to‘g‘risi, yer yorilmadi yerga kirib ketmadim. Qaniydi, mana shu xatolar respublika rahbarida bo‘lsa-yu, boshqarma boshlig‘i respublikadagi rahbarimizda shuncha xatolar bor, u tizimni yo‘lga qo‘yolmayapti, u bilan ishlash qiyin, desa. Bu boshqacha bo‘lardi. Mening viloyatga kelishimdan ham maqsad Shohjahon Omonovning qo‘lidan tutib, mana shunday ishlaysan va mana shunday muloqot qilasan, deb ko‘rsatish. Xatolarining bo‘lsa, tuzatasan va javob berasan. Muhimi, ishni to‘g‘ri yo‘lga qo‘yasan, deb o‘rgatishdan iborat”, — dedi Alisher Sa’ullayev.

Alisher Sa’dullayev jurnalist va blogerlarga murojaat qilib, boshqarma faoliyatiga doir xato-kamchiliklarni fosh qilishda davom etish lozimligini, ishlolmagan rahbar bir kuni, albatta, ishdan ketishga majbur bo‘lishini qo‘shimcha qildi.