Qozog‘iston sog‘liqni saqlash vaziri Aleksey Soy O‘zbekiston Sog‘liqni saqlash vazirligi rahbari Abduhakim Xojiboyev O‘zbekistondagi farmatsevtika korxonalaridan birida Qozog‘istonning QazCovid-in vaksinasini ishlab chiqarish imkoniyatini ko‘rib chiqishni taklif qildi. Bu haqda “Kursiv.kz” xabar berdi.
Xabarga ko‘ra, Qozog‘iston bosh vaziri o‘rinbosari Erali Tug‘janov o‘zbekistonlik hamkasblarini Qozog‘istonning yuqori texnologik tibbiy xizmat ko‘rsatuvchi yetakchi tibbiyot markazlariga tashrif buyurishga, birlamchi tibbiy yordam muassasalari darajasida axborot texnologiyalarining joriy etilishi, shuningdek, farmatsevtika ishlab chiqarishi bilan tanishishga taklif qilgan.
“Biz epidemiyaga qarshi kurashda sheriklikni faollashtirishni, bunday holatlarga tezkorlik bilan javob berish nuqtayi nazaridan samarali o‘zaro aloqalarni yaratishni, shuningdek, mavjud epidemiya holati va uni barqarorlashtirish bo‘yicha olib borilayotgan chora-tadbirlar to‘g‘risida doimiy ma’lumot almashishni yo‘lga qo‘yishni taklif qilamiz” — degan Qozog‘iston sog‘liqni saqlash vaziri Aleksey Soy.
Eslatib o‘tamiz, sentabr o‘rtalarida Qozog‘istonda Fan qo‘mitasining Biologik xavfsizlik muammolari ilmiy-tadqiqot institutida yaratilgan koronavirus infeksiyasiga qarshi QazCovid-in vaksinasining klinik sinovlari boshlangandi. Dekabr oyiga kelib ushbu vaksinaning III bosqich klinik sinovlarini o‘tkazish boshlandi. Uning dastlabki samaradorligi 96 foizga baholanmoqda. QazCovid-in vaksinasi bilan aholi ommaviy ravishda emlash 2021-yil mart oyidan boshlanishi aytilgan.
Qozog‘iston aholisi 1-fevraldan boshlab koronavirusga qarshi Rossiyaning “Sputnik V” vaksinasi bilan emlanmoqda. Mamlakatga vaksinaning birinchi partiyasi bir martalik import ruxsatnomasi asosida yetkazib berilgan. Ushbu vaksina Qozog‘istonda fevral oyi o‘rtalarida ro‘yxatdan o‘tkazildi. Hozirda Rossiyaning vaksinasi Qozog‘istondagi Qarag‘anda farmatsevtika majmuasi tomonidan ishlab chiqarilmoqda.
Ayni paytda O‘zbekistonda ZF-UZ-VAC 2001 vaksinasi foydalanish uchun ro‘yxatdan o‘tkazilgan. O‘zbekiston ushbu vaksinani ishlab chiqarishda Xitoyning Zhifei Longcom Biopharmaceutical Co. Ltd kompaniyasi bilan hammuallif hisoblanadi.
Izoh (0)