«Раҳбарни ишдан олиш учун менда етарли факторлар бўлган». Алишер Саъдуллаев агентликнинг Қашқадарёдаги масъули йўл қўяётган хатоларга нега кўз юмаётгани сабабини айтди

Ёшлар ишлари агентлиги директори Алишер Саъдуллаев агентликнинг Қашқадарё вилоятидаги масъули, бошқарма бошлиғи Шоҳжаҳон Омоновни ишдан бўшатиш учун етарли факторларга эга бўлганини, бироқ унга имконият бераётганини маълум қилди. Бу ҳақда агентликнинг вилоят бошқармасида бўлиб ўтган матбуот анжуманида айтилди, дея хабар берди «Дарё» мухбири.

Таъкидланишича, агентликнинг вилоят бошқармаси ташаббуси билан 5 март куни пресс-тур ташкил этилган. Пресс-тур якунида агентлик директори Алишер Саъдуллаев, вилоят ҳокими ўринбосари Рустам Йўлдошев ҳамда агентликнинг вилоятдаги масъули Шоҳжаҳон Омоновлар жураналист ва блогерларни қизиқтирган саволларга жавоб берган.

Матбуот анжуманида сўз олган Алишер Саъдуллаев «Дарё» мухбирининг «Агентликнинг Қашқадарё вилоятидаги масъуллари ОАВлар учун ёпиқлиги ва қилаётган ишлари сабаб журналист ва блогерлар орасида, жамоатчилик ўртасида салбий қиёфада гавдаланади ва ҳар доим салбий муносабат билан тилга олинади? Хўш, агентликнинг вилоятлардаги барча масъуллари худди Қашқадарёдаги вакиллари сингари салбий имиж яратганми? Ёки фақат Қашқадарёда шундайми?», деган саволига Қашқадарёда ҳолат ҳақиқатан ҳам ёмонлигини таъкидлади.

«Агентликнинг Қашқадарё вилоятидаги раҳбарининг имижи ҳақиқатан ҳам паст. Боиси вилоятдаги вакилимиз, биринчидан, дипломатияни йўлга қўёлмаган. Иккинчидан, фаолияти жуда суст. Учинчидан, раҳбарни ишдан олиб ташлаш учун менда етарли факторлар бўлган, лекин унга имконият беришга қарор қилганман. Балки уни бугун ишдан олиб ташларман, балки эртага ёки индинга. Лекин ишдан олиб ташлаш осон. Бунга битта буйруқ етарли. Аммо уни тарбиялаш, хатоларидан хулоса чиқаришга имконият бериш ҳам керак. Шу нуқтаи назардан биз Шоҳжаҳон Омоновга имконият бердик. Бошқа вилоятдаги раҳбарларимизнинг иш фаолияти бундай эмас. Улар ишга бутун борлиғини бағишлаган. Шоҳжаҳон Омонов ҳам ҳаракат қиляпти. Аммо иш тажрибаси етмаяптими ёки жамоатчилик билан очиқ ишлашга мослашиб кетолмаяптими, ҳозирча ўхшамаяпти», — деди Алишер Саъдуллаев.

Агентлик директори вилоятдаги вакилининг ижтимоий тармоқлардаги танқидий чиқишларга ҳам ўз вақтида муносабат билдирмаслигини танқид қилди.

«Шахсан ўзим агентлик директори этиб тайинланган куним Facebook’да пост қолдирганман ва барчанинг фикрини ўрганганман. Ҳозир ҳам ҳар бир блогернинг биз ҳақимизда ёзаётган постларини диққат билан ўқийман. Шу менга қизиқ. Ҳатто изоҳларини ҳам бирма-бир ўқиб, муносабат билдираман. Ўша пайтда нега Шоҳжаҳон Омонов шу фикрларга, танқидий чиқишларга фирк билдирмаяпти деб ўйлайман. Балки у ўша фиркларни кузатар, аммо фикр билдириб, хатоси бўлса, уни тан олиб, тузатишга киришинини айтиши ва изоҳ қолдириши керак», — деди Алишер Саъдуллаев.

Алишер Саъдуллаев, шунингдек, журналист ва блогерлар билан мулоқотда агентликнинг вилоят бошқармаси фаолиятига оид хато-камчиликларни эшитиб, изза бўлаётганини таъкидлади.

«Ҳозир бу ердаги муаммолар ва масалаларни эшитиб, тўғриси, ер ёрилмади ерга кириб кетмадим. Қанийди, мана шу хатолар республика раҳбарида бўлса-ю, бошқарма бошлиғи республикадаги раҳбаримизда шунча хатолар бор, у тизимни йўлга қўёлмаяпти, у билан ишлаш қийин, деса. Бу бошқача бўларди. Менинг вилоятга келишимдан ҳам мақсад Шоҳжаҳон Омоновнинг қўлидан тутиб, мана шундай ишлайсан ва мана шундай мулоқот қиласан, деб кўрсатиш. Хатоларининг бўлса, тузатасан ва жавоб берасан. Муҳими, ишни тўғри йўлга қўясан, деб ўргатишдан иборат», — деди Алишер Саъуллаев.

Алишер Саъдуллаев журналист ва блогерларга мурожаат қилиб, бошқарма фаолиятига доир хато-камчиликларни фош қилишда давом этиш лозимлигини, ишлолмаган раҳбар бир куни, албатта, ишдан кетишга мажбур бўлишини қўшимча қилди.