Yoshlar ishlari agentligining Qashqadaryodagi mansabdori ogohlantirildi, xodimlar bo‘yicha mas’uli intizomiy jazo oldi

Yoshlar ishlari agentligining Qashqadaryo viloyati boshqarmasi boshlig‘i Shohjahon Omonov vazifa yo‘riqnomasidagi talablarni qo‘pol ravishda buzib, yuqori turuvchi organning qarorlarini noto‘g‘ri talqin qilgani va agentlikni obro‘sizlantirishga harakat qilgani uchun ogohlantirildi. Boshqarmaning kadrlar bilan ishlash bo‘yicha mutaxassisi F.Eshmurodovga hujjatlar almashishdagi qo‘pol xatolari uchun intizomiy jazo qo‘llanildi. Bu haqda agentlikning rasmiy Telegram kanalida xabar berilgan.

Ta’kidlanishicha, “Daryo” internet nashrida e’lon qilingan “Qashqadaryodagi ayrim tumanlarda Yoshlar ishlari bo‘limlariga agentlik tavsiya qilgan nomzodlar emas, boshqalar tayinlandi. Chunki agentlikning xati ‘yuridik kuchga ega emas’” sarlavhali maqola agentlik tomonidan o‘rganib chiqilgan.

“Mazkur holat bo‘yicha barcha mas’ullar ishtirokida yig‘ilish o‘tkazildi va unda maqolada keltirilgan har bir masala chuqur muhokama qilindi”, — deyiladi agentlik rasmiy munosabatida.

“Daryo”dagi maqolada Yoshlar ishlari agentligining 2020-yil 19-avgust kunidagi xatida agentlikning tuman va shahar bo‘limi boshliqlari lavozimiga saralangan nomzodlarning ro‘yxati keltirilgani, unda agentlikning G‘uzor tumani bo‘limi rahbarligiga N.Saidov, Shahrisabz shahar bo‘limiga Sh.Islomov, Chiroqchi tuman bo‘limiga A.Beknazarov, Dehqonobod tumaniga A.Qulmamatov nomzodi tavsiya etilgani xabar berilgandi. Maqolada shuningdek, boshqarma agentlik xatiga amal qilmagani yozilgandi.

“O‘rganishlar davomida agentlikning viloyat boshqarmasi tomonidan O‘zbekiston Yoshlar ittifoqi tizimida faoliyat olib borgan nomzodlar bilan suhbat tashkil qilingani va natijalariga ko‘ra Dehqonobod tuman bo‘limi rahbarligiga O.Normurodov, Shahrisabz shahri bo‘limiga D.Ahmedov, Chiroqchi tuman bo‘limiga J.Xursandov tayinlangani aniqlandi. Boshqarmaning munosabatida ta’kidlangan tavsiya etilgan ayrim nomzodlarning ish haqidan qoniqmagani, sohada tajribasi yetarli emasligi, muammolardan bexabar, ish rejasi yo‘q, ish haqidan bexabar kabi sabablar va baholar mutlaqo asossizdir. Vaholanki, agentlik tavsiya etgan barcha nomzodlarning malakasi, bilimi va sohani yaxshi tushunishi o‘tkazilgan suhbatlar chog‘ida aniqlangan hamda ular o‘z roziligi bilan bu lavozimlarga ishlash uchun qiziqish bildirishgan”, — deydi agentlik mas’ullari.

Aytilishicha, yig‘ilish davomida lavozimiga tayinlanmagan to‘rt nafar nomzod bilan agentlik direktori Alisher Sa’dullayev telefon orqali muloqot o‘tkazgan.

“Chiroqchi tuman bo‘limi boshlig‘i lavozimiga tavsiya etilgan Alisher Beknazarov hozirda tumandagi 170-sonli umumiy o‘rta ta’lim maktabi direktori bo‘lib ishlayotgani, o‘z istiqbolini ta’lim sohasida ko‘rayotganini bayon qildi. Uning o‘rniga tayinlangan Jamshid Xursandov faoliyatini davom ettirishi belgilangan. Shuningdek, Shahrisabz tuman bo‘limi boshlig‘i lavozimiga tavsiya etilgan Sherzod Islomov hozirda Shahrisabz shahridagi O‘zbekiston Respublikasi bosh vazirining Tadbirkorlarning murojaatlarini ko‘rib chiqish qabulxonasi mudiri lavozimida ishlayotgani, faoliyatini tadbirkorlar faoliyatini qo‘llab-quvvatlash bo‘yicha davom ettirishini ma’lum qilgan. Uning o‘rniga tayinlangan Davron Ahmedov faoliyatini davom ettirishi belgilangan. G‘uzor tuman bo‘limi boshlig‘i lavozimiga tavsiya etilgan Nodirjon Saidov hozirda salomatligini tiklash jarayonida ekanligini hamda Xalq deputatlari G‘uzor tumani Kengashi deputati sifatida yoshlarni qo‘llab-quvvatlashda davom etishini bildirgan. Dehqonobod tuman bo‘limi boshlig‘i lavozimiga tavsiya etilgan Adham Qulmamatov o‘z ishini boshlashi belgilandi”, — deyiladi agentlik munosabatida.

Qo‘shimcha ma’lumot berilishicha, ayni kunda Yoshlar ishlari agentligi markaziy apparatida 75 nafar, hududiy boshqarmalarda 154 nafar, tuman (shahar)lardagi bo‘linmalarda 406 nafar mas’ul xodim faoliyat olib bormoqda. Bugungi kunga kelib agentlikning Qashqadaryo viloyat boshqarmasida 11 ta, tuman (shahar) bo‘limlarida 45 ta shtat jadvali asosida 56 nafar rahbar va mas’ul xodim faoliyati yo‘lga qo‘yilgan.

Agentlik munosabati so‘ngida “Daryo” nashri bilan hamkorlikka tayyorligini ma’lum qilgan.

“O‘zbekistondagi yetakchi internet nashrlaridan biri hisoblangan ‘Daryo.uz’ sayti jurnalistlarining yoshlar masalasi bo‘yicha tanqidiy va tahliliy chiqishlari va bu mavzuga doimiy e’tiborini yuqori baholagan holda agentlik faoliyatiga daxldor OAVdagi har qanday chiqishlarga tezkor, xolis va haqqoniy munosabat bildirib borilishi ta’minlanishini, jurnalistlar bilan hamkorlik uchun doimo ochiqligini yana bir bor ta’kidlaymiz”, — deyiladi agentlik axborot xizmati munosabatida.