Farg‘onada 2021-yilda 600 ming nafardan ziyod farg‘onalik COVID-19’ga qarshi vaksina bilan mutlaqo bepul hamda bosqichma-bosqich emlanishi rejalashtirilgan. Bu haqda “Daryo”ga Sanitariya-epidemiologik osoyishtalik va jamoat salomatligi xizmati viloyat boshqarmasi ma’lum qildi.
Boshqarmaning immunoprofilaktika bo‘limi mudiri Anvar Yarullinning qayd etishicha, birinchi navbatda koronavirus yuqish xavfi darajasi yuqori bo‘lgan shaxslarni emlash nazarda tutilgan. Viloyatda mazkur toifaga kiradigan va emlanishi rejalashtirilgan 187 ming 830 nafar 65 yoshdan oshgan keksa, 310 ming 534 nafar surunkali kasalliklari bor shaxs, 51 ming 260 nafar tibbiyot xodimi, 107 ming 164 nafar maktab va maktabgacha ta’lim tashkilotlari xodimi mavjud.
Ta’kidlanishicha, koronavirus infeksiyasiga qarshi emlash faqatgina ixtiyoriylik tamoyili asosida amalga oshiriladi.
“Boshqarmamiz uchun BMTning bolalar jamg‘armasi YuNISEF tomonidan 1 ta muzlatkichli yuk mashinasi va 19 ta Miniven-Labo avtomobillari topshirildi. Ulardan viloyat bo‘ylab emlangan aholi monitoringini olib borish, vaksinalarni saqlash va tashish sifatini yaxshilash uchun foydalanamiz”, — dedi Anvar Yarullin.
Eslatib o‘tamiz, O‘zbekistonda koronavirusga qarshi ilk vaksina sifatida Xitoyning Zhifei Longcom Biopharmaceutical Co. Ltd kompaniyasi bilan hamkorlikda ishlab chiqarilgan vaksina 1-mart kuni davlat ro‘yxatidan o‘tkazilgan. O‘zbekistonning hissasi va sa’y-harakatlarini inobatga olib, kompaniya ZF 2001 vaksinani birga yaratgan hammuallif mamlakat sifatida belgiladi. Ushbu yangi vaksinani ZF-UZ-VAC 2001 nomi bilan ishlab chiqarish foydalanishga kelishilgan.
Vaksina koronavirusning “britancha” va “afrikacha” shtammlariga qarshi Moderna vaksinasidan olti barobarga yaxshiroq bo‘lib chiqqani ma’lum qilingan.
Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlagan.
Bundan tashqari, Rossiya tashqi ishlar vaziri “Sputnik V” vaksinasi O‘zbekistonda ro‘yxatga olinganini aytdi. Vaksinani ommaviy qo‘llash jarayoniga 17-fevral kuni ruxsat berilgan edi.
Shuningdek, O‘zbekiston COVAX dasturi doirasida 2,6 million doza AstraZeneca vaksinasini olishi ma’lum qilingan.
Izoh (0)