Фарғонада 600 минг нафардан ортиқ аҳоли коронавирусга қарши бепул эмланади

Фарғонада 2021 йилда 600 минг нафардан зиёд фарғоналик COVID-19’га қарши вакцина билан мутлақо бепул ҳамда босқичма-босқич эмланиши режалаштирилган. Бу ҳақда «Дарё»га Санитария-эпидемиологик осойишталик ва жамоат саломатлиги хизмати вилоят бошқармаси маълум қилди.

Бошқарманинг иммунопрофилактика бўлими мудири Анвар Яруллиннинг қайд этишича, биринчи навбатда коронавирус юқиш хавфи даражаси юқори бўлган шахсларни эмлаш назарда тутилган. Вилоятда мазкур тоифага кирадиган ва эмланиши режалаштирилган 187 минг 830 нафар 65 ёшдан ошган кекса, 310 минг 534 нафар сурункали касалликлари бор шахс, 51 минг 260 нафар тиббиёт ходими, 107 минг 164 нафар мактаб ва мактабгача таълим ташкилотлари ходими мавжуд.

Таъкидланишича, коронавирус инфекциясига қарши эмлаш фақатгина ихтиёрийлик тамойили асосида амалга оширилади.

«Бошқармамиз учун БМТнинг болалар жамғармаси ЮНИСЕФ томонидан 1 та музлаткичли юк машинаси ва 19 та Минивен-Лабо автомобиллари топширилди. Улардан вилоят бўйлаб эмланган аҳоли мониторингини олиб бориш, вакциналарни сақлаш ва ташиш сифатини яхшилаш учун фойдаланамиз», — деди Анвар Яруллин.

Эслатиб ўтамиз, Ўзбекистонда коронавирусга қарши илк вакцина сифатида Хитойнинг Zhifei Longcom Biopharmaceutical Cо. Ltd компанияси билан ҳамкорликда ишлаб чиқарилган вакцина 1 март куни давлат рўйхатидан ўтказилган. Ўзбекистоннинг ҳиссаси ва саъй-ҳаракатларини инобатга олиб, компания ZF 2001 вакцинани бирга яратган ҳаммуаллиф мамлакат сифатида белгилади. Ушбу янги вакцинани ZF-UZ-VAC 2001 номи билан ишлаб чиқариш фойдаланишга келишилган.

Вакцина коронавируснинг «британча» ва «африкача» штаммларига қарши Moderna вакцинасидан олти баробарга яхшироқ бўлиб чиққани маълум қилинган.

Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танлаган.

Бундан ташқари, Россия ташқи ишлар вазири «Спутник V» вакцинаси Ўзбекистонда рўйхатга олинганини айтди. Вакцинани оммавий қўллаш жараёнига 17 февраль куни рухсат берилган эди.

Шунингдек, Ўзбекистон COVAX дастури доирасида 2,6 миллион доза AstraZeneca вакцинасини олиши маълум қилинган.