O‘zbekiston sog‘liqni saqlash vaziri Abduhakim Hojiboyev Moskvada Rossiya Iste’molchilar huquqlarini himoya qilish va inson farovonligini nazorat qilish federal xizmati (“Rospotrebnadzor”) rahbari Anna Popovaga “Mehr-saxovat” ko‘krak nishonini topshirdi, deb xabar bermoqda “Dunyo” axborot agentligi.
O‘zbekistonning Rossiyadagi elchixonasi ma’lum qilishicha, marosim chog‘ida “Rospotrebnadzor” rahbari Prezident Shavkat Mirziyoyevga mukofot uchun minnatdorlik bildirgan.
Ma’lumot uchun, pandemiya paytida bir guruh rossiyalik yetakchi mutaxassislar o‘zbekistonlik hamkasblariga uslubiy va amaliy yordam ko‘rsatish uchun O‘zbekistonga yuborilgan. “Rospotrebnadzor”, shuningdek, O‘zbekistonga 140 ming dona test to‘plamini yubordi.
Eslatib o‘tamiz, O‘zbekiston Prezidentining 2020-yil 26-maydagi farmoniga muvofiq, koronavirus pandemiyasi davrida, shuningdek, turli tabiiy ofatlarga qarshi kurashishda, ularning oqibatlarini bartaraf etishda mardlik va jasorat namunasini ko‘rsatgan, aholining ijtimoiy himoyaga muhtoj qatlamlarini har tomonlama qo‘llab-quvvatlashga katta hissa qo‘shgan, jamiyatda tinchlik-osoyishtalikni mustahkamlashda faol ishtirok etishda o‘rnak bo‘layotgan fuqarolarni taqdirlash maqsadida “Mehr-saxovat” ko‘krak nishoni ta’sis etilgan.
Bundan avval “Rospotrebnadzor” O‘zbekistonda tarqalgan koronavirus shtammining o‘zgarishini o‘rganishi, “Rospotrebnadzor” rahbari bahorda COVID-19 pandemiyasi tugashini taxmin qilgani hamda “Rospotrebnadzor” koronavirus bilan kasallangan odam qachon maksimal darajada yuqumli bo‘lishini ma’lum qilgani haqida xabar berilgandi.
Izoh (0)