“To‘rt yilda oliy ta’lim tizimi ham ‘reanimatsiya’ bo‘ldi” – oliy va o‘rta maxsus ta’lim vaziri

Oliy Majlis Qonunchilik palatasida 2-mart kuni o‘tkazilgan “Hukumat soati”da Oliy va o‘rta maxsus ta’lim vaziri Abduqodir Toshqulov tizimda amalga oshirilayotgan ishlar va muammolar to‘g‘risida so‘z yuritdi, deya xabar bermoqda “Daryo” muxbiri.

“Bugun oliy ta’lim tizimidagi ta’lim sifati, laboratoriyalar, o‘quv binolari kabi ko‘plab masalalar atrofida har qancha fikrlashish mumkin. Lekin ular ichida eng dolzarbi va ijtimoiy ahamiyatga ega bo‘lgani bu – talabalarning nafaqat o‘qishi, balki ularning yashashi, turar joyi hamdir. Men nima uchun bu gapni aytyapman? Kuni kecha Yunusobodda besh nafar talabani hamda qurilishda yuridik universiteti talabasining nobud bo‘lgani hammamizning yuragimizga qayg‘u soldi. Bunga kimdir beparvo bo‘ldi, kimdir qaramadi, barchamizga yomon ta’sir qildi. Bugungi mavzu ham aynan shu masalaga qaratilgani uchun men hech narsani xaspo‘shlab, taraf olish niyatida emasman, haqiqiy holatni sizlar bilan fikrlashib olishdan manfaatdorman”, — dedi Toshqulov tadbir avvalida.

Uning ta’kidlashicha, 2020-yilda OTMlarga qabul kvotasi 58 ming nafardan 148 ming nafarga oshgan.

“O‘zbekistonda barcha sohalar qatori ta’lim, xususan, oliy ta’lim ham qaysidir ma’noda ‘reanimatsiya’ bo‘ldi, desak mubolag‘a bo‘lmaydi. To‘rt yilda 55 ta OTM qo‘shildi, ya’ni ular soni 77 tadan 132 taga yetdi. Qabul kvotasi 58 ming 12 nafardan 2020-yilda 148 ming 114 nafarga, ya’ni 2,6 barobarga oshdi. Talabalar kontingenti 279 ming nafardan 640 ming nafarga yetdi, bu 2,3 barobarga to‘g‘ri keladi. Qamrov darajasi 9 foizdan 25 foizga, ya’ni qariyb 3 barobar oshdi. Bu juda katta ko‘rsatkich, bu xalqimiz farzandlari uchun katta imkoniyat”, — dedi vazir.