O‘zbekiston mart—aprel oylarida Rossiya bilan muntazam aviaqatnovlarni tiklash niyatida. Mamlakatda koronavirus bilan bog‘liq vaziyat Rossiyada belgilangan mezonlarga mos keladi. Bu haqda transport vaziri o‘rinbosari Jasurbek Choriyev 2-mart kuni jurnalistlarga ma’lum qildi, deb xabar bermoqda “Gazeta.uz”.
“Hozircha biz Rossiya tomonning javobini kutyapmiz. Menimcha mart—aprel oylarida qandaydir ijobiy natija bo‘ladi”, — degan u Toshkentda O‘zbekiston transport diplomatiyasiga bag‘ishlab o‘tkazilgan davra suhbatida.
Jasurbek Choriyevning ta’kidlashicha, O‘zbekiston tomon COVID-19 bilan bog‘liq epidemiologik vaziyat haqidagi barcha ma’lumotlarni Rossiya Federatsiyasining koronavirusga qarshi kurash bo‘yicha maxsus komissiyasiga yuborgan.
“Biz muntazam parvozlarni tiklash uchun Rossiya komissiyasi tomonidan belgilangan mezonlarga muvofiq barcha standartlarga mos kelamiz”, — deb qo‘shimcha qilgan u.
Eslatib o‘tamiz, O‘zbekiston 1-oktabrdan boshlab barcha xalqaro avia, temiryo‘l va avtoyo‘l qatnovlari uchun o‘z chegaralarini ochdi. Uzbekistan Airways 2020-yilning sentabrida Turkiya, BAA, Belarus, Qozog‘iston va Qirg‘iziston bilan, 2021-yilning yanvarida Tojikiston, fevral oyida Germaniya, mart oyida Hindiston bilan muntazam aviaparvozlarni tikladi.
Koronavirus bilan bog‘liq vaziyat jiddiy bo‘lib qolayotgan mamlakatlarga, xususan, Rossiyaga parvozlarni maxsus reyslarda amalga oshirish davom etmoqda. O‘zbekistondan Rossiyaga aviareys orqali borish uchun PZR-test natijasi salbiy chiqqan ma’lumotnomaga, shuningdek, davolanish yoki oila bilan birlanish uchun zarur hujjatga ega bo‘lish lozim.
Izoh (0)