PZR natijasi manfiy ma’lumotnoma bilan O‘zbekistonga kirib kelgan 173 nafar yo‘lovchida ekspress testda musbat natija qayd etildi. Bu haqda AOKAda 2-mart kuni bo‘lib o‘tgan matbuot anjumanida ma’lum qilindi.
Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonovning bildirishicha, 2020-yilning 25-dekabridan 2021-yil 2-martgacha bo‘lgan holatda 325 303 nafar PZR natijasi manfiy bo‘lgan O‘zbekistonga kirib keluvchilarning 173 nafarida musbat natija qayd etilgan.
Ularning 72 nafarida aeroportda, 101 nafari esa temiryo‘llar va chegara punktlarida aniqlangan.
Eslatib o‘tamiz, koronavirus kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasi qaroriga ko‘ra, 2020-yil 25-dekabrdan boshlab O‘zbekistonga kirib kelayotganlar koronavirusga qarshi antitanani aniqlash uchun o‘z hisobidan ekspress test topshirishi belgilandi.
O‘zbekistonga temiryo‘l orqali kirib kelgan ayrim fuqarolar bunday testlar narxi qimmatligidan norozi bo‘lgandi. “O‘zbekiston temir yo‘llari” bunga munosabat bildirib, COVID-19’ni aniqlash uchun ekspress tahlillar xususiy klinika tomonidan amalga oshirilganini, mas’uliyati cheklangan jamiyatlar alohida xo‘jalik yurituvchi subyektlar hisoblangani uchun ko‘rsatilayotgan xizmatlar narxini mustaqil ravishda belgilashi hamda amaldagi qonunchilikka muvofiq ular faoliyatiga har qanday aralashuv va cheklovlar o‘rnatilishiga yo‘l qo‘yilmasligini ma’lum qilgandi.
O‘zbekiston Tashqi ishlar vazirligi xorijga chiquvchi fuqarolarni qalbaki PZR-test ma’lumotnomalaridan ogohlantirib, ulardan bu ish bo‘yicha “yordamlashish” borasidagi takliflarga ko‘nmaslikka chaqirgandi.
Izoh (0)