ПЗР натижаси манфий маълумотнома билан Ўзбекистонга кириб келган 173 нафар йўловчида экспресс тестда мусбат натижа қайд этилди. Бу ҳақда АОКАда 2 март куни бўлиб ўтган матбуот анжуманида маълум қилинди.
Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбоновнинг билдиришича, 2020 йилнинг 25 декабридан 2021 йил 2 мартгача бўлган ҳолатда 325 303 нафар ПЗР натижаси манфий бўлган Ўзбекистонга кириб келувчиларнинг 173 нафарида мусбат натижа қайд этилган.
Уларнинг 72 нафарида аэропортда, 101 нафари эса темир йўллар ва чегара пунктларида аниқланган.
Эслатиб ўтамиз, коронавирус кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига кўра, 2020 йил 25 декабрдан бошлаб Ўзбекистонга кириб келаётганлар коронавирусга қарши антитанани аниқлаш учун ўз ҳисобидан экспресс тест топшириши белгиланди.
Ўзбекистонга темир йўл орқали кириб келган айрим фуқаролар бундай тестлар нархи қимматлигидан норози бўлганди. «Ўзбекистон темир йўллари» бунга муносабат билдириб, COVID-19’ни аниқлаш учун экспресс таҳлиллар хусусий клиника томонидан амалга оширилганини, масъулияти чекланган жамиятлар алоҳида хўжалик юритувчи субъектлар ҳисоблангани учун кўрсатилаётган хизматлар нархини мустақил равишда белгилаши ҳамда амалдаги қонунчиликка мувофиқ улар фаолиятига ҳар қандай аралашув ва чекловлар ўрнатилишига йўл қўйилмаслигини маълум қилганди.
Ўзбекистон Ташқи ишлар вазирлиги хорижга чиқувчи фуқароларни қалбаки ПЗР-тест маълумотномаларидан огоҳлантириб, улардан бу иш бўйича «ёрдамлашиш» борасидаги таклифларга кўнмасликка чақирганди.
Изоҳ (0)