Toshkentda 4 ming dollar evaziga Milliy gvardiya tizimiga ishga kiritib qo‘ymoqchi bo‘lgan shaxsga jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum bo‘lishicha, N.Q. fuqaro D.ga qalbaki xizmat guvohnoma ko‘rsatib, Milliy gvardiya tizimiga tanishlari orqali ishga kiritib qo‘yishga ishontirib, evaziga 4 ming dollar so‘ragan. Talab qilingan pulni firibgarlik yo‘li bilan olgan vaqtida departament va Toshkent shahar IIBB va Milliy gvardiya xodimlari bilan hamkorlikda o‘tkazilgan tezkor tadbirda ashyoviy dalillar bilan ushlangan.
Holat yuzasidan fuqaro N.Q.ga nisbatan Jinoyat kodeksining 168-moddasi (firibgarlik), 28-,211-moddasi (pora berish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Milliy gvardiya tizimiga ishga kiritib qo‘yish uchun Gulistonda 1,5 ming dollar, Qarshida 4,5 ming dollar, Samarqandda 27 ming dollar olgan shaxslar ushlangani haqida xabar berilgan edi.
Izoh (0)