“O‘zbekiston temir yo‘llari” mamlakatga kirib kelganda topshiriladigan ekspress testlar narxi qimmatligi haqida fuqarolar noroziliklariga munosabat bildirdi

12-fevral kuni ijtimoiy tarmoqlarda charter reyslar orqali O‘zbekistonga kirib kelgan fuqarolar noroziligi aks ettirilgan videolavha tarqalgan va bunga sabab qilib koronavirus infeksiyasini aniqlash uchun to‘lov narxlari yuqoriligi ko‘rsatilgan. “O‘zbekiston temir yo‘llari” Markaziy sanitariya-epidemiologiya stansiyasi mazkur voqeani o‘rganib chiqdi, deb xabar bermoqda kompaniya matbuot xizmati.

Ma’lum qilinishicha, videolavha 2021-yilning 17-yanvarida 483-sonli Voljskiy—Toshkent yo‘nalishdagi charter reysi orqali Qoraqalpog‘iston chegara temiryo‘l bekatiga kirib kelgan yo‘lovchilar tomonidan tasvirga olingan. Ushbu vokzalda yo‘lovchilardan COVID-19’ni aniqlash uchun ekspress tahlillar “Ajiniyaz Qaraqalpaq” MChJ xususiy klinikasi tomonidan amalga oshirilgan.

Ta’kidlanishicha, mas’uliyati cheklangan jamiyatlar alohida xo‘jalik yurituvchi subyektlar hisoblanib, ko‘rsatilayotgan xizmatlar narxini mustaqil ravishda belgilaydi hamda amaldagi qonunchilikka muvofiq ular faoliyatiga har qanday aralashuv va cheklovlar o‘rnatilishiga yo‘l qo‘yilmaydi. Shu jumladan, “O‘zbekiston temir yo‘llari” aksiyadorlik jamiyati tomonidan ham. Ya’ni monopoliyaga yo‘l qo‘yilmasligi uchun ushbu xususiy klinika faoliyatiga to‘sqinlik qilinishi mutlaqo mumkin emas.

Xabarda, shuningdek, mas’uliyati cheklangan jamiyatlar faoliyatidan norozi bo‘lgan fuqarolar o‘rnatilgan tartibda huquqni muhofaza qiluvchi va sud organlariga murojaat qilishlari mumkinligi bildirilgan.

Eslatib o‘tamiz, koronavirus kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasi qaroriga asosan, 2020-yilning 25-dekabridan e’tiboran O‘zbekistonga kirib kelayotgan shaxslardan koronavirus infeksiyasi antigenini aniqlash ekspress testini olish joriy etildi.

Shuningdek, COVID-19 koronavirus infeksiyasini aniqlash uchun tahlillar Sog‘liqni saqlash vazirligi va Sanitariya-epidemiologik osoyishtalik va jamoat salomatligi xizmati tomonidan berilgan tegishli ruxsatnoma (litsenziya, sertifikat)larga ega bo‘lgan va mulkchilik shaklidan qat’i nazar, tibbiyot muassasalari tomonidan amalga oshiriladi.