Oliy Majlis Qonunchilik palatasi deputati Rasul Kusherbayev bo‘lib o‘tadigan prezidentlik saylovlariga o‘z nomzodini qo‘ymaydi. Bu haqda deputatning o‘zi shu bo‘yicha savol bergan jurnalistga javob bergan.
“Menda bunday niyat yo‘q, buni adashmasam, beshinchi yoki oltinchi marta aytyapman. Birinchidan, bunga xohish yo‘q, ikkinchidan, yoshim yetmaydi, uchinchidan, bunga insonda uzoq yillik mehnat va bilim tajribasi bo‘lishi kerak.
Agar bugungi kunda yurtdoshlarimizda men haqimda bunday ijobiy fikrlar paydo bo‘lgan bo‘lsa, bu o‘zgarishlarga birinchi navbatda amaldagi davlat rahbarining olib borayotgan siyosati, deputatlarga e’tibori, ochiqlik va oshkoralikka yaratib bergan sharoitlari natijasi deb bilaman. Va bu yo‘lda prezidentni to‘liq qo‘llab-quvvatlayman.
Men O‘zbekistonning farovonligi, rivoji yo‘lida davlat rahbari tomonidan qanday ijobiy islohotlar olib borilayotgan bo‘lsa, mana shu islohotlarning faol ijrochisi, uni joylarga yetkazish va natijasini yuzaga chiqarish yo‘lida o‘zimni xizmatimni sarflayman degan maqsad bilan yashayapman, harakat qilyapman. Buni shu ma’noda qabul qilishlaringizni so‘ragan bo‘lardim”, – deydi deputat.
Deputat o‘zining Telegram-kanalida bu mavzuning u bilan bog‘liq qismi shu bilan yakunlanishiga umid qilgan.
“Iltimosim bu savolni boshqa ko‘tarmaylik. Qayerda va qanday vazifada bo‘lmasin yurtdoshlarimizga yaxshilik qilish va mamlakat rivojiga hissa qo‘shishga bo‘lgan ishtiyoq so‘nmasa bo‘ldi. O‘zimiz bilgan va xohlagan yo‘lda ketishda davom etamiz”, – deydi Rasul Kusherbayev .
Bundan avval Rasul Kusherbayev xalq hokimlarni saylashga tayyorligini, bolaning o‘qishga kirishi maktabning bo‘ynida emasligi hamda Jahongir Otajonovning prezidentlikka nomzodini qo‘ymoqchi bo‘lgani demokratiya yo‘lida ekanligimizni anglatishini ta‘kidlagan edi.
Eslatib o‘tamiz, Senat O‘zbekiston prezidenti saylovini dekabrdan oktabrga ko‘chirish to‘g‘risidagi qonunni ma’qullagan. 9-fevral kuni Shavkat Mirziyoyev prezident saylovini oktabrga ko‘chirish to‘g‘risidagi qonunni imzolagan edi.
Izoh (0)