Олий Мажлис Қонунчилик палатаси депутати Расул Кушербаев бўлиб ўтадиган президентлик сайловларига ўз номзодини қўймайди. Бу ҳақда депутатнинг ўзи шу бўйича савол берган журналистга жавоб берган.
«Менда бундай ният йўқ, буни адашмасам, бешинчи ёки олтинчи марта айтяпман. Биринчидан, бунга хоҳиш йўқ, иккинчидан, ёшим етмайди, учинчидан, бунга инсонда узоқ йиллик меҳнат ва билим тажрибаси бўлиши керак.
Агар бугунги кунда юртдошларимизда мен ҳақимда бундай ижобий фикрлар пайдо бўлган бўлса, бу ўзгаришларга биринчи навбатда амалдаги давлат раҳбарининг олиб бораётган сиёсати, депутатларга эътибори, очиқлик ва ошкораликка яратиб берган шароитлари натижаси деб биламан. Ва бу йўлда президентни тўлиқ қўллаб-қувватлайман.
Мен Ўзбекистоннинг фаровонлиги, ривожи йўлида давлат раҳбари томонидан қандай ижобий ислоҳотлар олиб борилаётган бўлса, мана шу ислоҳотларнинг фаол ижрочиси, уни жойларга етказиш ва натижасини юзага чиқариш йўлида ўзимни хизматимни сарфлайман деган мақсад билан яшаяпман, ҳаракат қиляпман. Буни шу маънода қабул қилишларингизни сўраган бўлардим», – дейди депутат.
Депутат ўзининг Telegram-каналида бу мавзунинг у билан боғлиқ қисми шу билан якунланишига умид қилган.
«Илтимосим бу саволни бошқа кўтармайлик. Қаерда ва қандай вазифада бўлмасин юртдошларимизга яхшилик қилиш ва мамлакат ривожига ҳисса қўшишга бўлган иштиёқ сўнмаса бўлди. Ўзимиз билган ва хоҳлаган йўлда кетишда давом этамиз», – дейди Расул Кушербаев .
Бундан аввал Расул Кушербаев халқ ҳокимларни сайлашга тайёрлигини, боланинг ўқишга кириши мактабнинг бўйнида эмаслиги ҳамда Жаҳонгир Отажоновнинг президентликка номзодини қўймоқчи бўлгани демократия йўлида эканлигимизни англатишини таъкидлаган эди.
Эслатиб ўтамиз, Сенат Ўзбекистон президенти сайловини декабрдан октябрга кўчириш тўғрисидаги қонунни маъқуллаган. 9 февраль куни Шавкат Мирзиёев президент сайловини октябрга кўчириш тўғрисидаги қонунни имзолаган эди.
Изоҳ (0)