Ijtimoiy tarmoqlarda farzandiga zulm qilayotgan ona videosi tarqaldi. Holat bo‘yicha Toshkent IIBB ma’lumot berdi

Ijtimoiy tarmoqlarda ona o‘z farzandini urib, unga zulm qilayotgani tasvirlangan video tarqaldi. Holat yuzasidan Toshkent shahar IIBB ma’lumot berdi.

Qayd etilishicha, mazkur holat Toshkent shahar IIBB rahbariyati tomonidan nazoratga olingan. Yunusobod tumani IIO FMB xodimlari tomonidan o‘tkazilgan tekshiruv davomida videoda aks etgan fuqarolarning shaxsi aniqlangan.

Ma’lum qilinishicha, 35 yoshli Shahlo E. va 45 yoshli Zayniddin E. ajrashish yoqasidagi oila hisoblanadi. Shahlo E. muqaddam xotin-qizlar masalalari bo‘yicha inspektorlarga murojaat qilgan va unga himoya orderi berilgan. Shuningdek, er-xotin o‘zaro janjali jarayonida 9 yoshli voyaga yetmagan farzandidan foydalanayotgani aniqlangan.

“Video 2020-yili tasvirga olingan, bir nechta videotasvirlardan montaj qilingan. Ichki ishlar organlari xodimlari tomonidan bola tahsil oladigan maktab o‘qituvchilari bilan o‘tkazilgan suhbat jarayonida, so‘nggi vaqtlarda bola xulqidagi o‘zgarishlar ularni tashvishga solayotgani ma’lum qilingan.

Bolaning ota-onasi bilan suhbat o‘tkazilgan. Bolaning o‘zi bilan psixologlar ishlamoqda”, — deyiladi xabarda.

Bundan avval Toshkentda kursdoshining ukasi bilan sodir bo‘lgan janjaldan so‘ng, komaga tushgan San’at instituti talabasi o‘ziga kelgani, Surxondaryoda pochchasi va ikki nafar qarindoshiga pichoq urgan shaxsga jinoyat ishi qo‘zg‘atilgani hamda Qashqadaryoda nevarasini urgani uchun o‘qituvchini haqoratlab, unga tarsaki tushirgan ayolga nisbatan sudga da’vo arizasi kiritilishi haqida xabar berilgandi.