Islom Karimov nomidagi Farg‘ona viloyat teatr-konsert saroyida 27-fevral kuni Xalq deputatlari viloyat, shahar va tuman kengashlarining Oliy Majlis Senati a’zosi saylovi bo‘yicha qo‘shma majlisi bo‘lib o‘tdi. Majlisda Senat a’zolarini saylash masalasi ko‘rib chiqildi deb, xabar berdi “Daryo” muxbiri Azizjon Ermatov.
Markaziy saylov komissiyasining 2021-yil 23-fevraldagi qaroriga asosan o‘tkazilgan majlisda xalq deputatlari viloyat, tuman va shahar Kengashlarining 603 nafar deputati ishtirok etgan. Majlis kun tartibiga Farg‘ona viloyati bo‘yicha bo‘shab qolgan ikkita o‘ringa Oliy Majlis Senati a’zolarini saylash masalasi kiritilgan.
Shahar-tuman kengashlari deputatlaridan iborat maslahat kengashi qo‘shma majlis muhokamasiga 2-Mirzo Ulug‘bek saylov okrugidan xalq deputatlari viloyat kengashi deputati, viloyat hokimi Xayrullo Bozorov nomzodini, 31-Quva saylov okrugi bo‘yicha viloyat kengashi deputati, viloyat ona va bola skrining markazi direktori Manzura Salimova nomzodini yashirin ovoz berish uchun byulletenga kiritishni taklif qildi. Mazkur taklif ma’qullandi va yashirin ovoz berish yo‘li bilan Oliy Majlis Senati a’zolarini saylash bo‘yicha saylov o‘tkazildi.
Shundan so‘ng sanoq komissiyasining hisoboti tinglandi. Unga ko‘ra, Farg‘ona viloyati, tuman va shahar kengashlari deputatlarining ko‘pchilik ovozi bilan Xayrullo Bozorov va Manzura Salimova Oliy Majlis Senati a’zolari etib saylandi. Deputatlar ovoz berish natijalarini tasdiqladi.
“Bildirilgan katta ishonch uchun minnatdorlik bildiraman. Bor kuchim, bor g‘ayratim, bor bilimim bilan Farg‘ona viloyatiga, xalqimizga xizmat qilishga va’da beraman. Birlikda, hamjihatlikda ish olib borsak xalqimizni rozi qilamiz”, — dedi Xayrullo Bozorov.
Izoh (0)