Shavkat Mirziyoyev 22-fevral, dushanba kuni “Zargarlik sanoatini yanada rivojlantirish uchun qulay shart-sharoitlar yaratish chora-tadbirlari to‘g‘risida”gi qarorni imzoladi. Spot hujjatning aosiy jihatlariga e’tibor qaratdi.
Birinchidan, zargarlik buyumlarini ishlab chiqaruvchilarga qimmatbaho metallarni to‘g‘ridan to‘g‘ri shartnoma asosida yoki kechiktirib to‘lash sharti bilan sotishga ruxsat berildi. Ushbu tartib 2023-yil 1-martgacha amal qiladi.
Ikkinchidan, 2021-yil 1-apreldan:
- zargarlik buyumlariga asillik darajasi tamg‘asi va ishlab chiqaruvchining shaxsiy tamg‘asi mexanik (zarb) yoki lazer usullari yordamida tushirishga ruxsat etiladi.
- zargarlik buyumlariga asillik darajasi tamg‘asi va ishlab chiqaruvchining shaxsiy tamg‘asi bilan tamg‘alash usuli zargarlik buyumlarini ishlab chiqaruvchilar tomonidan mustaqil belgilanadi;
- affinaj faoliyatini amalga oshirish huquqi uchun litsenziyaga ega bo‘lgan yuridik shaxslarga o‘zlari ishlab chiqargan o‘lchovli yombilarni jismoniy va yuridik shaxslarga mustaqil belgilangan (London qimmatbaho metallar birjasining ertalabki fiksing narxi va Markaziy bankning kursidan kam bo‘lmagan) narxlarda sotishga ruxsat beriladi;
- qimmatbaho metallardan va qimmatbaho (yarim qimmatbaho) toshlardan yasalgan zargarlik buyumlarini ichki va tashqi bozorlarda onlayn-savdo orqali sotishga ruxsat beriladi;
- mijozlarni tekshirish tartibi o‘zgarmoqda. Xususan, to‘lov naqd pulda amalga oshirilgan yoki bazaviy hisoblash miqdorining 600 baravaridan oshmagan taqdirda tekshirilmaydi.
To‘rtinchidan, zargarlar 300 million so‘mgacha bo‘lgan miqdorda 3 yil muddatga, 6 oygacha imtiyozli davr bilan mikrokreditlar ajratishni so‘rab “O‘zmilliybank”ga murojaat qilishi mumkin.
Beshinchidan, qimmatbaho metallarni ishlab chiqarishda hosil bo‘ladigan parchalarni va chiqindilarni, qimmatbaho metallarning o‘lchov plastinalari va granulalari, qimmatbaho va yarim qimmatbaho toshlar, qimmatbaho metallar va qimmatbaho toshlardan yasalgan yarim tayyor mahsulotlarni realizatsiya qilish bo‘yicha aylanmani QQSdan ozod etish bo‘yicha hujjat loyihasini ishlab chiqish topshirig‘i berildi.
Eslatib o‘tamiz, Shavkat Mirziyoyev 2019-yil 8-may kuni o‘tkazilgan yig‘ilishda zargarlikni chinakam sanoat darajasiga olib chiqish vazifasini qo‘ygan edi. Ko‘p o‘tmay, o‘sha yili 18-mayda Prezidentning “O‘zbekiston Respublikasida zargarlik tarmog‘ini jadal rivojlantirish chora-tadbirlari to‘g‘risida”gi farmoni qabul qilindi. Farmon bilan O‘zbekistonda 2019—2023-yillarda zargarlik tarmog‘ini rivojlantirish bo‘yicha chora-tadbirlar dasturi imzolandi.
Izoh (0)