Шавкат Мирзиёев 22 февраль, душанба куни «Заргарлик саноатини янада ривожлантириш учун қулай шарт-шароитлар яратиш чора-тадбирлари тўғрисида»ги қарорни имзолади. Spot ҳужжатнинг аосий жиҳатларига эътибор қаратди.
Биринчидан, заргарлик буюмларини ишлаб чиқарувчиларга қимматбаҳо металларни тўғридан-тўғри шартнома асосида ёки кечиктириб тўлаш шарти билан сотишга рухсат берилди. Ушбу тартиб 2023 йил 1 мартгача амал қилади.
Иккинчидан, 2021 йил 1 апрелдан:
- заргарлик буюмларига асиллик даражаси тамғаси ва ишлаб чиқарувчининг шахсий тамғаси механик (зарб) ёки лазер усуллари ёрдамида туширишга рухсат этилади.
- заргарлик буюмларига асиллик даражаси тамғаси ва ишлаб чиқарувчининг шахсий тамғаси билан тамғалаш усули заргарлик буюмларини ишлаб чиқарувчилар томонидан мустақил белгиланади;
- аффинаж фаолиятини амалга ошириш ҳуқуқи учун лицензияга эга бўлган юридик шахсларга ўзлари ишлаб чиқарган ўлчовли ёмбиларни жисмоний ва юридик шахсларга мустақил белгиланган (Лондон қимматбаҳо металлар биржасининг эрталабки фиксинг нархи ва Марказий банкнинг курсидан кам бўлмаган) нархларда сотишга рухсат берилади;
- қимматбаҳо металлардан ва қимматбаҳо (ярим қимматбаҳо) тошлардан ясалган заргарлик буюмларини ички ва ташқи бозорларда онлайн-савдо орқали сотишга рухсат берилади;
- мижозларни текшириш тартиби ўзгармоқда. Хусусан, тўлов нақд пулда амалга оширилган ёки базавий ҳисоблаш миқдорининг 600 бараваридан ошмаган тақдирда текширилмайди.
Тўртинчидан, заргарлар 300 миллион сўмгача бўлган миқдорда 3 йил муддатга, 6 ойгача имтиёзли давр билан микрокредитлар ажратишни сўраб «Ўзмиллийбанк»га мурожаат қилиши мумкин.
Бешинчидан, қимматбаҳо металларни ишлаб чиқаришда ҳосил бўладиган парчаларни ва чиқиндиларни, қимматбаҳо металларнинг ўлчов пластиналари ва гранулалари, қимматбаҳо ва ярим қимматбаҳо тошлар, қимматбаҳо металлар ва қимматбаҳо тошлардан ясалган ярим тайёр маҳсулотларни реализация қилиш бўйича айланмани ҚҚСдан озод этиш бўйича ҳужжат лойиҳасини ишлаб чиқиш топшириғи берилди.
Эслатиб ўтамиз, Шавкат Мирзиёев 2019 йил 8 май куни ўтказилган йиғилишда заргарликни чинакам саноат даражасига олиб чиқиш вазифасини қўйган эди. Кўп ўтмай, ўша йили 18 майда Президентнинг «Ўзбекистон Республикасида заргарлик тармоғини жадал ривожлантириш чора-тадбирлари тўғрисида»ги фармони қабул қилинди. Фармон билан Ўзбекистонда 2019—2023 йилларда заргарлик тармоғини ривожлантириш бўйича чора-тадбирлар дастури имзоланди.
Изоҳ (0)