Ayni paytda Prezident Shavkat Mirziyoyev raisligida o‘tkazilayotgan Xalq deputatlari Namangan viloyati kengashining navbatdan tashqari 26-sessiyasi bo‘lib o‘tmoqda. Davlat rahbari mahalla raislari haqida so‘z yuritarkan, ular mahalla islohotchisi bo‘lishi zarurligini qayd etdi, deya xabar bermoqda “Daryo” muxbiri.
“Mahalla raisi islohotchi bo‘lishi zarur. Bu juda murakkab jarayon, ammo harakat qilsak, ko‘zlagan maqsadimizga, albatta, erishamiz. Bugungi mahalla raisi avvalgidek to‘y va boshqa marosimlarda odamlarni kutib o‘tiradigan odam emas, u zamonlar o‘tib ketdi.
Namangan viloyatidagi mavjud 775 ta mahallaning har birining raisi bugungi o‘zgarishlarga o‘zini munosib ko‘ra olsa, o‘zini islohotchi bo‘la olishiga ishonsa, katta natijalarga erishadi. Kecha “Dashtbog‘” mahallasining 22 yoshli Muzaffar ismli raisi bilan suhbatlashdim. Unda fidoyilik, bilim va maqsad bor. Bu mahalla juda og‘ir hudud. Lekin Muzaffarda harakat borligini ko‘rdim.
Shu o‘rinda bir tashabbus haqida gapirmoqchiman. Shu paytgacha mahalla raisi vazifasida ishlab kelgan viloyatdagi oqsoqollarimiz bilan mahalliy deputatlar, hokimlik vakillari suhbatlashsa. Ular orasida sog‘lig‘idagi muammosi, bilimi tufayli hozirgi zamon talabiga munosib rais bo‘la olmayotganini o‘zi his qilib, ochiq ta’kidlaganlarni hurmati, obro‘sini joyiga qo‘ygan holda mahalla raisi maslahatchisi qilishimiz kerak. Mahallalarga ham bugungi islohotlarga befarq bo‘lmagan, zamon talablarini tushunadigan odam rais bo‘lishi kerakligini davrning o‘zi taqozo etyapti. Mana shu tashabbusni Namangan viloyati misolida amalga oshirishimiz zarur”, — dedi Prezident.
Avvalroq Shavkat Mirziyoyev Namanganda jurnalistlar bilan muloqot qilib, O‘zbekistonning yanada rivojlanishiga to‘siq bo‘layotgan uchta asosiy muammoni aytgan edi. Shuningdek, Prezident Namanganda Art soft holding shirkatining ilmiy-amaliy malaka oshirish markazi bilan ham tanishgan. Prezident Namangan viloyatini boshqa hududlarga namuna sifatida ko‘rsatishining sabablarini ma’lum qilgan edi.
Izoh (0)