Samarqandda o‘g‘rilik sodir qilib yurgan jinoiy guruh faoliyatiga chek qo‘yildi. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, Kattaqo‘rg‘on shahar IIBga Kattaqo‘rg‘on tumanida yashovchi fuqaro ariza bilan murojaat qilib, uning Alisher Navoiy ko‘chasida joylashgan telefon va telefon ehtiyot qismlari sotiladigan do‘koniga noma’lum shaxs o‘g‘rilikka kirib, 8 million so‘mlik telefonlarini o‘g‘irlab ketganini bildirgan.
IIV tezkor qidiruv hamkorlik bo‘limi hamda viloyat IIB jinoyat qidiruv bo‘limi hamda Kattaqo‘rg‘on shahar IIB JQB xodimlari tomonidan olib borilgan tezkor-qidiruv tadbirlari natijasida mazkur jinoyatni muqaddam Jinoyat kodeksining 169-moddasi (o‘g‘rilik) 2-qismi bilan sudlangan, IIOlar qidiruvida bo‘lgan Toshkent viloyati Bekobod tumanida yashovchi 19 yoshli D.Sh., 15 yoshli A.Sh., Jizzax shahrida yashovchi 17 yoshli M.R. va Sirdaryo shahrida yashab kelgan fuqaro Q.B. sodir etganligi aniqlanib, ulardan 3 dona Inoi rusumli hamda 1 dona Samsung Galaxy J-2 rusumli qo‘l telefoni daliliy ashyo sifatida hujjatlashtirib olingan.
Holat yuzasidan Jinoyat kodeksining 169-moddasi (o‘g‘rilik) 2-qismi “g” bandi jinoyat ishi qo‘zg‘atilib, tergov harakatlari olib borilmoqda.
Izoh (0)