Айни пайтда Президент Шавкат Мирзиёев раислигида ўтказилаётган Халқ депутатлари Наманган вилояти кенгашининг навбатдан ташқари 26-сессияси бўлиб ўтмоқда. Давлат раҳбари маҳалла раислари ҳақида сўз юритаркан, улар маҳалла ислоҳотчиси бўлиши зарурлигини қайд этди, дея хабар бермоқда «Дарё» мухбири.
«Маҳалла раиси ислоҳотчи бўлиши зарур. Бу жуда мураккаб жараён, аммо ҳаракат қилсак, кўзлаган мақсадимизга, албатта, эришамиз. Бугунги маҳалла раиси аввалгидек тўй ва бошқа маросимларда одамларни кутиб ўтирадиган одам эмас, у замонлар ўтиб кетди.
Наманган вилоятидаги мавжуд 775 та маҳалланинг ҳар бирининг раиси бугунги ўзгаришларга ўзини муносиб кўра олса, ўзини ислоҳотчи бўла олишига ишонса, катта натижаларга эришади. Кеча «Даштбоғ» маҳалласининг 22 ёшли Музаффар исмли раиси билан суҳбатлашдим. Унда фидойилик, билим ва мақсад бор. Бу маҳалла жуда оғир ҳудуд. Лекин Музаффарда ҳаракат борлигини кўрдим.
Шу ўринда бир ташаббус ҳақида гапирмоқчиман. Шу пайтгача маҳалла раиси вазифасида ишлаб келган вилоятдаги оқсоқолларимиз билан маҳаллий депутатлар, ҳокимлик вакиллари суҳбатлашса. Улар орасида соғлиғидаги муаммоси, билими туфайли ҳозирги замон талабига муносиб раис бўла олмаётганини ўзи ҳис қилиб, очиқ таъкидлаганларни ҳурмати, обрўсини жойига қўйган ҳолда маҳалла раиси маслаҳатчиси қилишимиз керак. Маҳаллаларга ҳам бугунги ислоҳотларга бефарқ бўлмаган, замон талабларини тушунадиган одам раис бўлиши кераклигини даврнинг ўзи тақозо этяпти. Мана шу ташаббусни Наманган вилояти мисолида амалга оширишимиз зарур», — деди Президент.
Аввалроқ Шавкат Мирзиёев Наманганда журналистлар билан мулоқот қилиб, Ўзбекистоннинг янада ривожланишига тўсиқ бўлаётган учта асосий муаммони айтган эди. Шунингдек, Президент Наманганда Art soft holding ширкатининг илмий-амалий малака ошириш маркази билан ҳам танишган. Президент Наманган вилоятини бошқа ҳудудларга намуна сифатида кўрсатишининг сабабларини маълум қилган эди.
Изоҳ (0)