Surxondaryo viloyatining Jarqo‘rg‘on tumanida yashovchi fuqaro Qashqadaryo viloyatining Dehqonobod tumanida yashovchi tanishini 215 million so‘mga chuv tushirdi. Bu haqda “Daryo”ga Dehqonobod tuman IIB boshlig‘i o‘rinbosari Dilshod Mirzayev xabar berdi.
Ma’lum bo‘lishicha, Surxondaryo viloyatida yashovchi fuqaro A.H. Dehqonobod tumanidagi tanishi X.M.ga dastlab mashina olib berishni va’da qilib, uning 80 million so‘m pulini oladi. Aytilgan vaqt va fursat yetsa-da, mashinadan darak bo‘lmaydi.
Puli yoki mashinasini so‘ragan tanishiga esa unda yangi fikr tug‘ilganini aytib, kovrak shirasi oldi-sotdisi bilan shug‘ullanishni taklif qiladi. Yolg‘on gaplar bilan tanishining ishonchiga kirgan fuqaro kovrak ekish uchun yer olib berish va’dasi bilan undan yana pul oladi. Tez orada surxondaryolik fuqaro dehqonobodlik tanishining 215 million so‘m pulini o‘z shaxsiy manfaatlari uchun sarflab yuboradi.
Dehqonobod tumanining “Yashnobod” mahallasida viloyat IIB boshlig‘i o‘rinbosari Xurshid Otanazarov, Dehqonobod tuman IIB boshlig‘i G‘ayrat Haydarov ishtirokidagi davra suhbatida ayni shu masala muhokama qilindi.
“Dehqonobodlik fuqaroni 215 million so‘mga chuv tushirgan Surxondaryo viloyatining Jarqo‘rg‘on tumanida yashovchi 42 yoshli fuqaroga nisbatan jinoyat ishi qo‘zg‘atilib, tergov-surishtiruv ishlari boshlab yuborildi”, — deydi viloyat IIB boshlig‘i o‘rinbosari, tergov boshqarmasi boshlig‘i Xurshid Otanazarov.
Shuningdek, davra suhbatida so‘z olgan MFY raisi va mahalla oqsoqollari hududda firibgarlik jinoyati sodir etilganini afsus bilan tilga olib, bundan keyin jinoyat sodir etilishiga yo‘l qo‘ymaslik haqida fikr bildirdi.
Izoh (0)