Prezident Shavkat Mirziyoyevning 18-fevral kuni Namangan viloyatiga tashrifi davomida Namangan shahridagi “Ishga marhamat” monomarkazida jurnalistlar bilan muloqot qilib, ular tomonidan berilgan bir qancha savollarga javob qaytardi, deya xabar qilmoqda “Daryo” muxbiri.
Davlat rahbari har doim Namangan viloyati va xalqi to‘g‘risida alohida mehr bilan gapirishi hamda boshqa viloyatlarga o‘rnak sifatida ko‘rsatishining sabablariga oid savolga shunday izoh berdi:
“Haqiqatan ko‘p uchrashuvlarda, har bir selektor yig‘ilishida Namanganni boshqa viloyatlarga ibrat qilib ko‘rsataman. Bu viloyat bilan Farg‘onani taqqoslab, tahlil qilib ko‘raylik. Farg‘onada neftni qayta ishlash zavodi, “Farg‘onaazot” kabi katta-katta korxonalar bor. Namanganda-chi? Umuman yirik korxonalar yo‘q. Afsuski, 30 yil ichida bu viloyatda maqtashga arzigulik katta korxonalar qurmadik.
Men ushbu viloyat xalqini nima uchun maqtayman? Chunki namanganliklar tartib-intizomni yaxshi ko‘radi, ularda tadbirkorlik, birlashish, natijaga ishlash degan odat bor. Ish uslubi madaniyati juda yuqori. Oxirgi yillarda viloyat rahbariyati tadbirkorlarga davlat bergan imkoniyatlarni yetkazishda zamon talabiga munosib ishlayapti, tadbirkorlar ishongan.
Boshqa viloyatlar asosiy soliqni yirik korxonalardan bajaradi, Namangan esa o‘rta va kichik biznes bilan. Ayniqsa, so‘nggi yillardagi harakatlarimiz o‘z natijasini beryapti. Misol uchun, o‘tgan yili pandemiya paytida viloyatning yalpi ishlab chiqarishi 5 foizdan oshdi, sanoat ulushi 16 foiz bo‘ldi. Hech qaysi viloyatda bunday natija bo‘lgani yo‘q.
Men, albatta, Namangan xalqining mehnati, harakatlari va natijasiga qarab, ularni maqtayman, munosib rag‘batlantiraman va har doim ibrat sifatida ko‘rsataman”, — dedi davlat rahbari.
Avvalroq Shavkat Mirziyoyev Namanganda jurnalistlar bilan muloqot qilib, O‘zbekistonning yanada rivojlanishiga to‘siq bo‘layotgan uchta asosiy muammoni aytgan. Shuningdek, Prezident Namanganda Art soft holding shirkatining ilmiy-amaliy malaka oshirish markazi bilan ham tanishgan.
Izoh (0)