Buxoro shahrida yashovchi 49 yoshli R.S. alimentdan qarzdorlik evaziga farzandlariga Nexia-2 hamda ikki xonali kvartirasini hadya qildi. Bu haqda “Daryo”ga MIB viloyat boshqarmasi axborot xizmati rahbari Ilhom Tursunov xabar berdi.
Ta’kidlanishicha, fuqaro R.S. oilaviy ajrimdan so‘ng uzoq yillar davomida farzandlari ta’minoti uchun to‘lanishi lozim bo‘lgan aliment pulini to‘lashdan bo‘yin tovlab, Rossiyada ishlab yurgan. Unga bir necha bor ogohlantirishlar berilgan bo‘lishiga qaramasdan, u farzandlaridan umuman xabar olmagan.
Aniqlanishicha, fuqaro birinchi farzandi uchun ayni kunga qadar 13 million so‘m aliment to‘lovini amalga oshirishi lozim bo‘lgan. Ikkinchi farzandi uchun esa 18 yoshga to‘lgunga qadar umuman aliment to‘lamagan. Shu sabab unga nisbatan qidiruv ehtiyot chorasi qo‘llanilgan. Shundan so‘ng R.S.ning nomida bo‘lgan Nexia-2 avtomashinasi jarima maydonchasiga keltirilgan. Va o‘n kunlik muddat ichida qarzdorlik bartaraf etilmasa, avtomashinani realizatsiya qilish haqida ogohlantirilgan.
Mazkur voqealardan so‘ng qarzdor ota mashinasi va ikki xonali uyini o‘zaro notarial kelishuv asosida farzandlariga hadya qilgan.
Izoh (0)