Президент Шавкат Мирзиёевнинг 18 февраль куни Наманган вилоятига ташрифи давомида Наманган шаҳридаги «Ишга марҳамат» мономарказида журналистлар билан мулоқот қилиб, улар томонидан берилган бир қанча саволларга жавоб қайтарди, дея хабар қилмоқда «Дарё» мухбири.
Давлат раҳбари ҳар доим Наманган вилояти ва халқи тўғрисида алоҳида меҳр билан гапириши ҳамда бошқа вилоятларга ўрнак сифатида кўрсатишининг сабабларига оид саволга шундай изоҳ берди:
«Ҳақиқатан кўп учрашувларда, ҳар бир селектор йиғилишида Наманганни бошқа вилоятларга ибрат қилиб кўрсатаман. Бу вилоят билан Фарғонани таққослаб, таҳлил қилиб кўрайлик. Фарғонада нефтни қайта ишлаш заводи, «Фарғонаазот» каби катта-катта корхоналар бор. Наманганда-чи? Умуман йирик корхоналар йўқ. Афсуски, 30 йил ичида бу вилоятда мақташга арзигулик катта корхоналар қурмадик.
Мен ушбу вилоят халқини нима учун мақтайман? Чунки наманганликлар тартиб-интизомни яхши кўради, уларда тадбиркорлик, бирлашиш, натижага ишлаш деган одат бор. Иш услуби маданияти жуда юқори. Охирги йилларда вилоят раҳбарияти тадбиркорларга давлат берган имкониятларни етказишда замон талабига муносиб ишлаяпти, тадбиркорлар ишонган.
Бошқа вилоятлар асосий солиқни йирик корхоналардан бажаради, Наманган эса ўрта ва кичик бизнес билан. Айниқса, сўнгги йиллардаги ҳаракатларимиз ўз натижасини беряпти. Мисол учун, ўтган йили пандемия пайтида вилоятнинг ялпи ишлаб чиқариши 5 фоиздан ошди, саноат улуши 16 фоиз бўлди. Ҳеч қайси вилоятда бундай натижа бўлгани йўқ.
Мен, албатта, Наманган халқининг меҳнати, ҳаракатлари ва натижасига қараб, уларни мақтайман, муносиб рағбатлантираман ва ҳар доим ибрат сифатида кўрсатаман», — деди давлат раҳбари.
Аввалроқ Шавкат Мирзиёев Наманганда журналистлар билан мулоқот қилиб, Ўзбекистоннинг янада ривожланишига тўсиқ бўлаётган учта асосий муаммони айтган. Шунингдек, Президент Наманганда Art soft holding ширкатининг илмий-амалий малака ошириш маркази билан ҳам танишган.
Изоҳ (0)