Shavkat Mirziyoyev Namangan shahridagi Art soft holding shirkatining ilmiy-amaliy malaka oshirish markazi hamda “Ishga marhamat” monomarkazi faoliyati bilan tanishdi, deya xabar bermoqda Prezident matbuot xizmati.
Davlat rahbarining 2020-yil 11-avgustdagi “Kambag‘al va ishsiz fuqarolarni tadbirkorlikka jalb qilish, ularning mehnat faolligini oshirish va kasb-hunarga o‘qitishga qaratilgan hamda aholi bandligini ta’minlashga oid qo‘shimcha chora-tadbirlar to‘g‘risida”gi qaroriga muvofiq, barcha hududlarda shunday markazlar tashkil etilmoqda.
Art soft holding markazi to‘qimachilik sohasiga ixtisoslashgan. Bu yerda 12 ta ishchi kasb bo‘yicha yiliga 2 mingdan ziyod mutaxassis tayyorlanadi.
Uning yonida joylashgan monomarkazda 9 ta sohaning 27 xil yo‘nalishi bo‘yicha yiliga 3 ming nafardan ziyod aholi o‘qitiladi. Bu yo‘nalishlar mehnat bozori talablarini o‘rganish asosida tashkil etilgan. O‘quv va mashg‘ulot xonalari zarur asbob-anjom, stanok, kompyuter, mulyaj va boshqa amaliyot uskunalari bilan ta’minlangan.
Ta’kidlanishicha, markaz davlat-xususiy sheriklik tizimida ishlaydi. Mashg‘ulotlarni amaliyotchi ustalar, tadbirkorlar olib boradi. Davlat sharoit yaratib, ilmiy-ishlab chiqarish jihatidan ta’minlaydi, tadbirkorlar esa o‘zlari o‘qitgan yoshlarni ishga oladi. Ya’ni bu yerda kasb o‘rgangan yigit-qizlar ishsiz qolmaydi.
Markazda axborot texnologiyalari va xorijiy tillar ham o‘rgatiladi. Xususan, IT-mutaxassislar onlayn xizmatlar ko‘rsatib, yaxshi daromad topmoqda.
Prezident markazda yaratilgan sharoitlar bilan tanishdi, murabbiylar, kasb o‘rganayotgan yoshlar bilan suhbatlashdi.
Shavkat Mirziyoyev shu yerda ommaviy axborot vositalari vakillariga intervyu berdi. Davlat rahbari viloyatga kelishdan asosiy maqsadi, islohotlarni amalga oshirishda qiyinchilik tug‘dirayotgan omillar, Namanganning iqtisodiy salohiyati, ishbilarmon odamlari haqida gapirdi.
Prezidentning Namangan viloyatiga tashrifiga oid boshqa xabarlar:
- Shavkat Mirziyoyev Namangan viloyatiga tashrifini Yangiqo‘rg‘on tumanidan boshladi
- Shavkat Mirziyoyev Namanganda Chust textile xususiy to‘qimachilik korxonasini borib ko‘rdi
- Shavkat Mirziyoyev: “Ilmiy yondashuv yo‘qligi bois kartoshkani ham ko‘ngildagidek yetishtira olmayapmiz”
- Shavkat Mirziyoyev “Dashtbog‘” kichik sanoat zonasiga tashrif buyurdi
- Shavkat Mirziyoyev Namanganda jurnalistlar bilan muloqot qildi
- “Men ko‘proq oddiy odamlar bilan gaplashsam, sizlarning niyatlaringizni bilsam deyman”. Prezident mahalla nuroniylari bilan suhbat qildi
- Shavkat Mirziyoyev O‘zbekistonning yanada rivojlanishiga to‘siq bo‘layotgan uchta asosiy muammoni aytdi
Izoh (0)