Qiyma va pishloq bilan to‘ldirilgan piyozli taom retsepti

Bu ishtahaochar taomni, albatta, tayyorlab ko‘ring.

Kerakli mahsulotlar:

• piyoz — 8 dona;
• o‘simlik yog‘i —100 g;
• sarimsoq — 2 bo‘lak;
• qiyma — 200 g;
• non tolqoni — 70 g;
• pishloq — 100 g;
• quritilgan jambil — 1 choy qoshiq;
• tuz;
• murch;
• ko‘katlar.

1. Piyozni yuvib, qog‘oz sochiqqa artib quriting. Piyoz tik turishi uchun pastki qismidan, qopqoq bo‘lishi uchun yuqorisidan kesing;
2. Piyozlarni folga qog‘oziga o‘rab, 180 darajali pechda 50—60 daqiqa pishiring. Keyin pechdan olib, soviting;
3. O‘rta olovda qizigan yog‘da maydalangan sarimsoqni qovuring, unga qiymani ham solib, 2—3 daqiqaga dimlang;
4. Pishgan piyozlarning o‘rtasidan bir nechta qavatlarni olib tashlang;
5. Olib tashlangan piyoz qismini maydalab qiymaga qo‘shing va tuz, murch, non tolqoni, jambil, ko‘kat solib, yaxshilab aralashtiring;
6. Piyoz ichini “nachinka” bilan to‘ldirib, folgaga o‘rang va 180 darajali pechda 30—40 daqiqa davomida pishiring;
7. Pishishiga 5—10 daqiqa qolganda piyoz qopqog‘ini ochib, ustiga qirg‘ichdan o‘tkazilgan pishloqni seping. Qopqog‘ini yopib, pishirishda davom eting.