Janubiy Koreya xavfsizlik agentliklari har kuni KXDR xakerlari tomonidan uyushtirilgan o‘rtacha 1,58 millionta kiberhujumni qayd etmoqda. Xakerlar shu yo‘l bilan yiliga yuz ming dollarlab pul undiradi. Bu haqda Yaponiyaning Nikkei gazetasiga tayanib, “TASS” xabar berdi.
Xabarga ko‘ra, hujumlar, asosan, Janubiy Koreyadagi kichik va o‘rta kompaniyalarga qaratilgan bo‘lib, xakerlar u yerdagi kompyuterlarga virus kiritib, blokirovka qilishga urinadi.
Ba’zi hollarda kiberjinoyatchilar mijozlarning shaxsiy ma’lumotlari, bo‘lajak operatsiyalar to‘g‘risidagi maxfiy ma’lumotlarni oshkor qilish bilan tahdid qiladi. Kompyuterni blokdan chiqarish va ma’lumotlarni sir tutish uchun xakerlar pul talab qiladi. Uning miqdori, manbalarga ko‘ra, taxminan, 40,7 dan 470 ming dollargacha.
2020-yilda Janubiy Koreyada xakerlarning bunday harakatlari ortidan yetkazilgan zarar deyarli 1,8 milliard dollarni tashkil etgan, deyiladi xabarda. Nikkei ma’lumotlariga ko‘ra, bu miqdor so‘nggi besh yil ichida 18 baravar oshgan. Xakerlar, odatda, to‘lovni bitkoin shaklida talab qiladi, keyin uni Xitoydagi birjada qog‘oz valyutaga almashtiradi.
Avvalroq AQSh Adliya vazirligi shimoliy koreyalik uch nafar dasturchini ommaviy xakerlik hujumini uyushtirib, 1,3 milliard dollar qiymatga ega pul mablag‘i va kriptovalyuta o‘g‘irlaganlikda ayblagani haqida xabar berilgandi. Hujum banklardan tortib Gollivud kinostudiyalarini o‘z ichiga oluvchi bir qator kompaniyalarga uyushtirilgan.
Bundan tashqari, shimoliy koreyalik xakerlar Pfizer kompaniyasi serverlariga ham hujum uyushtirgan va vaksinaga oid ma’lumotlarni olishga uringan.
Izoh (0)