Yangi turdagi koronavirusdan to‘liq himoyalanish uchun uch bosqichli emlash talab qilinishi mumkin, deydi Microsoft asoschisi Bill Geyts. Unga ko‘ra, vaksinaning uchinchi dozasi tarkibi yangi mutatsiyalarni hisobga olgan holda takomillashtirilgan bo‘ladi. Bu haqda uning CBS News telekanaliga bergan intervyusiga asoslanib, “Korrespondent.net” xabar berdi.
“Ayni paytda hozirgi emlash sur’atini keng qamrovda olib borish kerakmi yoki mavjud vaksinalarning uchinchi dozasini olish kerakmi yoki bo‘lmasa, uning takomillashtirilgan varianti kerakmi, degan munozaralarni olib bormoqdamiz”— dedi Bill Geyts.
Geytsning ta’kidlashicha, koronavirusning yangi shtammlari AQShga yetib borgunga qadar dunyoda takomillashtirilgan vaksinalar ishlab chiqiladi.
Qo‘shma Shtatlarda koronavirusga qarshi aholini ommaviy emlash allaqachon boshlangan, ammo jarayon hali sust ketmoqda. AQSh prezidenti ma’muriyati ish boshlagan kundan boshlab, birinchi 100 kun ichida, ya’ni aprel oyining oxirigacha 100 million dozada vaksinatsiyani amalga oshirishga va’da bergan. AQShda qo‘llanilayotgan Moderna va Pfizer/BioNTech vaksinalarining har biri ikkita dozadan iborat.
AQSh koronavirusga chalinganlar va kasallikdan vafot etganlar sonining ko‘pligi bo‘yicha dunyoda yetakchilik qilmoqda. Jons Hopkins universiteti ma’lumotlariga ko‘ra, pandemiya boshidan beri AQShda 27,8 milliondan ortiq kishi infeksiya yuqtirgan, 490 ming kishi virus qurboniga aylangan.
Avvalroq Bill Geyts pandemiyadan keyin insoniyat duch keladigan ikkita xavf haqida ogohlantirgan edi. Birinchi tahdid sifatida u iqlim o‘zgarishini nazarda tutgan.Tadbirkor bioterrorizmni insoniyat uchun ikkinchi tahdid deb sanagan. “Zarar keltirishni istagan biror kishi virusni yarata oladi, demak, kelajakda bunga duch kelishimiz ehtimoli hozirgiga o‘xshash tabiiy epidemiyalarga qaraganda yuqoriroq”, — degan edi Geyts.
Izoh (0)