Жанубий Корея хавфсизлик агентликлари ҳар куни КХДР хакерлари томонидан уюштирилган ўртача 1,58 миллионта киберҳужумни қайд этмоқда. Хакерлар шу йўл билан йилига юз минг долларлаб пул ундиради. Бу ҳақда Япониянинг Nikkei газетасига таяниб, «ТАСС» хабар берди.
Хабарга кўра, ҳужумлар, асосан, Жанубий Кореядаги кичик ва ўрта компанияларга қаратилган бўлиб, хакерлар у ердаги компьютерларга вирус киритиб, блокировка қилишга уринади.
Баъзи ҳолларда кибержиноятчилар мижозларнинг шахсий маълумотлари, бўлажак операциялар тўғрисидаги махфий маълумотларни ошкор қилиш билан таҳдид қилади. Компьютерни блокдан чиқариш ва маълумотларни сир тутиш учун хакерлар пул талаб қилади. Унинг миқдори, манбаларга кўра, тахминан, 40,7 дан 470 минг долларгача.
2020 йилда Жанубий Кореяда хакерларнинг бундай ҳаракатлари ортидан етказилган зарар деярли 1,8 миллиард долларни ташкил этган, дейилади хабарда. Nikkei маълумотларига кўра, бу миқдор сўнгги беш йил ичида 18 баравар ошган. Хакерлар, одатда, тўловни биткоин шаклида талаб қилади, кейин уни Хитойдаги биржада қоғоз валютага алмаштиради.
Аввалроқ АҚШ Адлия вазирлиги шимолий кореялик уч нафар дастурчини оммавий хакерлик ҳужумини уюштириб, 1,3 миллиард доллар қийматга эга пул маблағи ва криптовалюта ўғирлаганликда айблагани ҳақида хабар берилганди. Ҳужум банклардан тортиб Голливуд киностудияларини ўз ичига олувчи бир қатор компанияларга уюштирилган.
Бундан ташқари, шимолий кореялик хакерлар Pfizer компанияси серверларига ҳам ҳужум уюштирган ва вакцинага оид маълумотларни олишга уринган.
Изоҳ (0)