Tojikistonda g‘arbiy Pomirdagi Fanlar akademiyasi tog‘ tizmasida joylashgan Korjenevskaya cho‘qqisi “Ozodi” deb, “Ozodi” cho‘qqisi esa “Sangtalak” deb qayta nomlandi. Bu haqda Tojikiston Til va atamashunoslik qo‘mitasi raisi Olimjon Muhammadjonzoda ma’lum qildi, deb yozadi Asia-Plus.
Uning so‘zlariga ko‘ra, 2020-yilda qo‘mita tomonidan aholi punktlarining 844 ta nostandart nomlari ko‘rib chiqilgan va ularni o‘zgartirish haqidagi hukumat qarorlari loyihasi tayyorlangan.
Korjenevskaya cho‘qqisi (endi “Ozodi” cho‘qqisi) — Fanlar akademiyasi tizmasining shimoliy qismida, Ismoil Somoniy cho‘qqisidan 13 km shimolda joylashgan 7105 metrlik tog‘ hisoblanadi.
Cho‘qqi 1910-yil 23-avgustida rus geografi Nikolay Korjenevskiy tomonidan kashf qilingan, u cho‘qqini o‘z rafiqasi Yevgeniya Korjenevskaya sharafiga nomlagan.
“Ozodi” cho‘qqisi esa 2009-yilda Tojikiston prezidenti tashabbusi bilan shunday nomlangan: ungacha 6230 metrlik cho‘qqi nomsiz bo‘lgan. Endi esa u “Sangtalak” deb nomlanadi.
Avvalroq Tojikistondagi Sarez ko‘lida ehtimoliy falokat haqida oldindan ogohlantirish tizimi O‘zbekiston chegarasigacha kengaytirilishi xabar berilgan edi.
Izoh (0)