Moskvada “Sputnik V” koronavirusga qarshi vaksinaning burunga tomiziladigan shakli uch bosqichli klinik sinovdan o‘tkaziladi. Bu haqda Moskva meri Sergey Sobyanin ma’lum qildi, deb yozmoqda “RBK”.
Shahar merining so‘zlariga ko‘ra, mutaxassislar burun-halqum sohasida immunitet hosil qiluvchi preparatning yangi turini ishlab chiqdi. “Ushbu dori vaksinaning o‘rnini to‘liq bosmaydi, ammo undan qo‘shimcha himoya sifatida foydalanish mumkin. Klinik sinovlarining har uch bosqichini ham Moskvada o‘tkazish rejalashtirilgan”, — dedi poytaxt meri.
Shuningdek, Sobyanin 18-fevral kuni Moskvada “Sputnik Layt” vaksinasining klinik sinovlari boshlanganini ma’lum qildi. Klinik sinovlari Moskvadagi 10 ta kasalxona bazasida bo‘lib o‘tadi.
Sobyaninning so‘zlariga ko‘ra, Gameleya institutda ishlab chiqilgan yangi “Sputnik Layt” preparati klassik “Sputnik V” ning asosiy kamchiliklarini — bemorga ikkita komponentni bir necha hafta farq bilan yuborish zaruratini yo‘q qilishi kerak.
“Bemor ‘Sputnik Layt’ vaksinasini qabul qilishi uchun kasalxonaga bir marta tashrif buyursa yetadi. Emlashdan bir yoki maksimal to‘rt hafta o‘tib, immunitet shakllana boshlaydi. ‘Sputnik Layt’ allaqachon sinovlarning birinchi bosqichidan o‘tgan. U bilan emlangan kishilarning barchasida COVID-19’ga qarshi immunitet rivojlandi. Organizm esa preparatni oddiy emlash singari qabul qildi” — deydi Sergey Sobyanin.
Uning qayd etishicha, Moskvada boshlangan emlash xalqaro klinik sinovlarning bir qismidir, unda Rossiya va Birlashgan Arab Amirliklaridan 3 ming kishi ishtirok etadi. Poytaxt meri “Sputnik V” bilan emlanmagan va boshqa qarshi ko‘rsatmalarga ega bo‘lmagan har qanday katta yoshli fuqaro tadqiqotda ishtirok etishi mumkinligini aytmoqda.
Bundan tashqari, Sobyanin shahardagi Bashlyayeva nomli bolalar kasalxonasi bazasida 14 yoshdan 18 yoshgacha bo‘lganlar uchun “Sputnik V” vaksinasini uch bosqichli klinik sinovdan o‘tkazilishini e’lon qildi. Natijaga qarab o‘spirinlarni emlash dasturiga kiritish to‘g‘risida qaror qabul qilinadi.
Avvalroq Moskva hukumati taksi haydovchilar uchun COVID-19’ga qarshi vaksinatsiyani tashkil qilmoqchiligi haqida xabar berilgandi. Xabarga ko‘ra, fuqaroligi bo‘lmagan taksi haydovchilari va kuryerlarning ham bepul emlanishiga ruxsat berilishi mumkin.
Izoh (0)