Москвада «Спутник V» коронавирусга қарши вакцинанинг бурунга томизиладиган шакли уч босқичли клиник синовдан ўтказилади. Бу ҳақда Москва мэри Сергей Собянин маълум қилди, деб ёзмоқда «РБК».
Шаҳар мэрининг сўзларига кўра, мутахассислар бурун-ҳалқум соҳасида иммунитет ҳосил қилувчи препаратнинг янги турини ишлаб чиқди. «Ушбу дори вакцинанинг ўрнини тўлиқ босмайди, аммо ундан қўшимча ҳимоя сифатида фойдаланиш мумкин. Клиник синовларининг ҳар уч босқичини ҳам Москвада ўтказиш режалаштирилган», — деди пойтахт мэри.
Шунингдек, Собянин 18 февраль куни Москвада «Спутник Лайт» вакцинасининг клиник синовлари бошланганини маълум қилди. Клиник синовлари Москвадаги 10 та касалхона базасида бўлиб ўтади.
Собяниннинг сўзларига кўра, Гамелея институтда ишлаб чиқилган янги «Спутник Лайт» препарати классик «Спутник V» нинг асосий камчиликларини — беморга иккита компонентни бир неча ҳафта фарқ билан юбориш заруратини йўқ қилиши керак.
«Бемор ‘Спутник Лайт’ вакцинасини қабул қилиши учун касалхонага бир марта ташриф буюрса етади. Эмлашдан бир ёки максимал тўрт ҳафта ўтиб, иммунитет шакллана бошлайди. ‘Спутник Лайт’ аллақачон синовларнинг биринчи босқичидан ўтган. У билан эмланган кишиларнинг барчасида COVID-19’га қарши иммунитет ривожланди. Организм эса препаратни оддий эмлаш сингари қабул қилди» — дейди Сергей Собянин.
Унинг қайд этишича, Москвада бошланган эмлаш халқаро клиник синовларнинг бир қисмидир, унда Россия ва Бирлашган Араб Амирликларидан 3 минг киши иштирок этади. Пойтахт мэри «Спутник V» билан эмланмаган ва бошқа қарши кўрсатмаларга эга бўлмаган ҳар қандай катта ёшли фуқаро тадқиқотда иштирок этиши мумкинлигини айтмоқда.
Бундан ташқари, Собянин шаҳардаги Башляева номли болалар касалхонаси базасида 14 ёшдан 18 ёшгача бўлганлар учун «Спутник V» вакцинасини уч босқичли клиник синовдан ўтказилишини эълон қилди. Натижага қараб ўспиринларни эмлаш дастурига киритиш тўғрисида қарор қабул қилинади.
Аввалроқ Москва ҳукумати такси ҳайдовчилар учун COVID-19’га қарши вакцинацияни ташкил қилмоқчилиги ҳақида хабар берилганди. Хабарга кўра, фуқаролиги бўлмаган такси ҳайдовчилари ва курьерларнинг ҳам бепул эмланишига рухсат берилиши мумкин.
Изоҳ (0)