GAA Classic Cars auksioni orqali Elvis Presliga tegishli bo‘lgan 1967-yilgi GMC pikapi sotuvga qo‘yiladi. Pikap ideal holatda saqlangan bo‘lib, sotuvchining ta’kidlashicha, “juda yaxshi yuradi”. Mashinaning boshlang‘ich narxi oshkor etilmagan, savdolar 20-fevral kuni boshlanadi, deb xabar beradi Motor.
Elvis Presli mazkur pikapni 1967-yilning fevralida yana xuddi shunaqa ikkita model bilan birga (qizil va ko‘k rangli) sotib olgan. Biroq qo‘shiqchi ulardan uzoq vaqt foydalanmagan: oradan bir yil o‘tgach, 1968-yilning martida qo‘shiqchining otasi avtomobilni Merilend shtatidagi dilerga sotib yuborgan.
Shundan so‘ng GMC’ning taqdiri murakkab kechgan. U bir necha bor o‘z egasini almashtirib, oxir-oqibat Elvis Presli muzeyiga kelib qolgan va ekspozitsiya bilan birga AQShning ko‘plab shtatlari hamda Kanadada sayohatda bo‘lgan. Mashinaning old paneliga aktyor Jey Leno va kantri-qo‘shiqchi Bleyk Sheltonning imzosi tushirilgan. Taxminan to‘rt yil oldin 54 yillik pikap to‘liq restavratsiya qilingan. Buning uchun yuk platformasi yechib olingan, ikki o‘rindiqli kabina yangilangan. Dvigatel ham ta’mirlangan, biroq yangi ehtiyot qismlar qo‘shilmagan — u butunlay original.
Mashinani bo‘yash vaqtida pikap oldin ham bo‘yalgani ma’lum bo‘lgan: yashil rangdan u qizilga aylangan va keyin yana yashilga bo‘yalgan. So‘nggi restavratsiya jarayonida ustalar yuqori sifatli qoplamadan foydalanib, unga zavoddagi rangini qaytarishga uringan. Qayd etilishicha, pikap ko‘plab yangi ehtiyot qismlariga ega bo‘lgan, biroq jamlanmalarning asosiy qismi 1967-yildan buyon saqlanib qolgan.
Orqa uzatmali pikap 4,1 litli V6 dvigateli yordamida harakatga keladi, u esa o‘z navbatida uch pog‘onali mexanik uzatmalar qutisi yordamida boshqariladi. Sotuvchining so‘zlariga ko‘ra, avtomobil hozirga qadar 134 ming kilometrga yaqin masofa bosgan.
Mavzuga doir:
Izoh (0)