Yaponiyada 13-fevral kuni 7,1 magnitudali zilzila sodir bo‘lgani to‘g‘risida xabar berilgandi. Tabiiy ofat oqibatida drift ixlosmandlari orasida mashhur bo‘lgan Ebisu Circuit poyga kompleksiga jiddiy shikast yetdi. Yer osti silkinishlari natijasida nafaqat poyga maydoniga, avtodrom yaqinidagi garajda saqlangan sportkarlarga ham shikast yetgan, deb xabar beradi Motor.
Ebisu Circuit poyga kompleksi “Fukusima-1” atom elektrostansiyasi yaqinida joylashgan, u yerda 2011-yili Yaponiya tarixidagi eng kuchli zilzila qayd etilgandi. Mutaxassislarning fikricha, Rixter shkalasi bo‘yicha sodir bo‘lgan 7,1 magnitudali zilzila aynan o‘sha ofatning aks sadosiga aylangan. Drift-poligon epimarkazdan 150 kilometr uzoqlikda joylashgan bo‘lsa-da, yer osti silkinishi kompleksga jiddiy zarar yetkazgan.
Zilzila oqibatida deyarli butun poyga trassasida yoriqlar paydo bo‘lgan. Yuzaga kelgan ko‘chkilar oqibatida drift-poligonning ayrim qismlari foydalanishga yaroqsiz holatga kelgan. Bundan tashqari, trassa yaqinidagi garajlar ham talafot ko‘rgan. Ushbu garajlarda mahalliy poygachilar o‘z sportkarlarini saqlagan. Ko‘plab bokslar qulab tushgan, ayrim angarlar esa butunlay vayron bo‘lgan.
Zilzila qancha avtomobilni vayronalar ostida qoldirgani va Ebisu Circuit’ga yetgan umumiy zararni mutaxassislar hisoblamoqda. Biroq hozirdan ma’lumki, poyga kompleksini qayta tiklashga uzoq vaqt kerak bo‘ladi.
Mavzuga doir:
Izoh (0)