Saxalinga yopirilgan kuchli siklon o‘zi bilan qor bo‘ronlari va kuchli shamolni olib keldi. “UAZ” tez yordam mashinasi ham mazkur tabiat hodisasining “qurboni”ga aylandi. 16-fevral kechasi Boshnyakovo qishlog‘i yaqinida ko‘chki ostida qolgan mashinani qor butunlay bosib qolgan. “Buxanka”ni kovlab olish uchun ekskavatorni yordamga chaqirishga to‘g‘ri kelgan, deb xabar beradi Motor.
E’tiborli jihati, mazkur tez yordam mashinasi qorga tiqilib qolgan boshqa bir tez yordam avtomobiliga yordam berish uchun ketayotgan bo‘lgan. “Uglegorsk yangiliklari” mahalliy gazetasining yozishicha, birinchi tez yordam mashinasidagi shifokor uyiga qaytayotgan bo‘lgan, biroq kichik qor ko‘chkisi bunga xalaqit qilgan. Ikkinchi tez yordam mashinasining haydovchisi unga yordam berish uchun mashinadan chiqqan: shu vaqt yana bir ko‘chki sodir bo‘lib, uning avtomobilini bosib qolgan.
Ikkala tibbiyot xodimi ham hech qanday jarohat olmagan. Ular qor uyumlari ostidan chiqib, uylariga yo‘l olgan. Qalin qor qatlami ostida qolgan mashinalar esa ertasi kuni ekskavator yordamida kovlab olingan.
Viloyat sog‘liqni saqlash boshqarmasining ma’lum qilishicha, qor ostidan chiqarib olingan “UAZ” biroz ta’mirtalab bo‘lib, shundan so‘ng, undan yana tibbiyot muassasalarida foydalanish mumkin.
Avvalroq amerikalik ayol qor bosib qolgan mashinasida 5 kun yashab, omon qolgani to‘g‘risida xabar berilgandi.
Izoh (0)