Microsoft asoschisi va sobiq rahbari Bill Geyts Sueddeutsche Zeitung’ga bergan intervyusida o‘zining koronavirus pandemiyasiga aloqadorligi to‘g‘risidagi fitna nazariyasiga izoh berdi, deb yozadi “RBK”.
Foto: Global Look Press
Tadbirkorning ta’kidlashicha, odamlar “oddiy yechimlarni” qidiradi va virus tarqalishi ortida kimdir turmasmikan degan savolni beradi. “Noto‘g‘ri ma’lumot vaksinatsiyaga xalaqit beradi, buning oqibatida epidemiya uzoqroq davom etadi”, — deydi Geyts.
Microsoft sobiq rahbarining so‘zlariga ko‘ra, Bill va Melinda Geyts fondi odamlarning vaksinatsiyaga bo‘lgan ishonchsizligiga anchadan buyon duch keladi. Masalan, Pokiston va Nigeriya kabi davlatlarda poliomiyelitga qarshi kurash vaqtida dori vositasining xavfsiz emasligi to‘g‘risida mish-mishlar tarqalgan — go‘yoki u bepushtlikka olib keladi. “Biz ta’sir doirasi katta bo‘lgan insonlarga, diniy ulamolarga murojaat qilib, ulardan vaksinatsiyaning ahamiyatini aholiga tushuntirishlarida yordam so‘radik”, — deydi u.
Tadbirkorning hisoblashicha, koronavirus kundalik hayotning bir qismiga aylanib ulgurgan — “xuddi zilzila, tornado yoki iqlim o‘zgarishlari kabi”. Hukumatning vazifasi esa fuqarolarni bu kabi ofatlardan himoya qilish hisoblanadi. Uning so‘zlariga ko‘ra, agarda insoniyat pandemiyaga yaxshiroq tayyor turganida, barchasi boshqacha bo‘lardi, xususan, o‘lim holati ancha kam qayd etilardi.
Geyts virusning yaratilishi ortida turgani va bundan foyda ko‘rishni maqsad qilgani to‘g‘risidagi fitna nazariyasi o‘tgan yilning dekabr boshlarida paydo bo‘lgandi. Tadbirkor vaksinatsiya orqali odamlarni chipslashtirmoqchi ekanligi haqidagi mish-mishlar ham keng tarqaldi. Microsoft sobiq rahbari bunga hech qanday aloqasi yo‘qligini ta’kidlab, “bu kabi ahmoqona fikrlarning mavjudligidan” xavotirda ekanligini bildirgan.
