Qashqadaryo viloyatining Chiroqchi tumanida “uchastkovoy” boshqaruvchidagi Nexia 7 yoshli maktab o‘quvchisini urib yubordi. Bu haqda “Daryo”ga viloyat prokuraturasi xabar berdi.
Ma’lum qilinishicha, voqea 2021-yil 16-fevral kuni soat 15:30 da sodir bo‘lgan.
“Chiroqchi tumani IIB xodimi, Beshchashma qishlog‘i profilaktika inspektori J.X. Nexia rusumli transport vositasida Chiroqchi tumani Yangiobod qishlog‘i hududidan o‘tgan 4-N Chiroqchi shahar aylanma avtomobil yo‘lining ikkinchi kilometrida harakatlanib kelib, 1-sonli umumiy o‘rta ta’lim maktabi yonidagi piyodalar o‘tish yo‘lagidan yo‘lni kesib o‘tayotgan maktab o‘quvchisi F.Q.ni mashinaning old tomoni bilan urib yuborib, yo‘l-transport hodisasi sodir etgan”, — deyiladi viloyat prokuraturasi bergan axborotda.
Qashqadaryo viloyat IIB axborot xizmati rahbari Iroda Rasulovaning ma’lumot berishicha, YTH ishtirokchisi bo‘lgan 7 yoshli qizaloq ayni paytda tuman tibbiyot birlashmasining jonlantirish bo‘limida davolanmoqda.
“Bugun qizaloqning bobosi bilan ham suhbatlashdik. Biz IIB xodimining xatti-harakatini oqlashdan yiroqmiz. To‘g‘ri, aybi bo‘lgan. Va shu sabab ham holat yuzasidan jinoyat ishi qo‘zg‘atildi. Biroq nafaqat profilaktika inspektori, tuman IIB boshlig‘i ham qizaloqning yaqinlariga ko‘mak berib, davolanishidan ham xabar olib turibdi. Buni qizaloqning yaqinlari ham tasdiqladi”, — deydi Iroda Rasulova.
Qo‘shimcha qilinishicha, hozirda mazkur holat yuzasidan Chiroqchi tumani prokuraturasi tomonidan profilaktika inspektoriga nisbatan Jinoyat kodeksining 266-moddasi 1-qismi (transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish badanga o‘rtacha og‘ir yoki og‘ir shikast yetkazilishiga sabab bo‘lsa) bilan jinoyat ishi qo‘zg‘atilib, tergov harakatlari olib borilmoqda.
Izoh (0)