Қашқадарё вилоятининг Чироқчи туманида «участковой» бошқарувчидаги Nexia 7 ёшли мактаб ўқувчисини уриб юборди. Бу ҳақда «Дарё»га вилоят прокуратураси хабар берди.
Маълум қилинишича, воқеа 2021 йил 16 февраль куни соат 15:30 да содир бўлган.
«Чироқчи тумани ИИБ ходими, Бешчашма қишлоғи профилактика инспектори Ж.Х. Nexia русумли транспорт воситасида Чироқчи тумани Янгиобод қишлоғи ҳудудидан ўтган 4-Н Чироқчи шаҳар айланма автомобиль йўлининг иккинчи километрида ҳаракатланиб келиб, 1-сонли умумий ўрта таълим мактаби ёнидаги пиёдалар ўтиш йўлагидан йўлни кесиб ўтаётган мактаб ўқувчиси Ф.Қ.ни машинанинг олд томони билан уриб юбориб, йўл-транспорт ҳодисаси содир этган», — дейилади вилоят прокуратураси берган ахборотда.
Қашқадарё вилоят ИИБ ахборот хизмати раҳбари Ирода Расулованинг маълумот беришича, ЙТҲ иштирокчиси бўлган 7 ёшли қизалоқ айни пайтда туман тиббиёт бирлашмасининг жонлантириш бўлимида даволанмоқда.
«Бугун қизалоқнинг бобоси билан ҳам суҳбатлашдик. Биз ИИБ ходимининг хатти-ҳаракатини оқлашдан йироқмиз. Тўғри, айби бўлган. Ва шу сабаб ҳам ҳолат юзасидан жиноят иши қўзғатилди. Бироқ нафақат профилактика инспектори, туман ИИБ бошлиғи ҳам қизалоқнинг яқинларига кўмак бериб, даволанишидан ҳам хабар олиб турибди. Буни қизалоқнинг яқинлари ҳам тасдиқлади», — дейди Ирода Расулова.
Қўшимча қилинишича, ҳозирда мазкур ҳолат юзасидан Чироқчи тумани прокуратураси томонидан профилактика инспекторига нисбатан Жиноят кодексининг 266-моддаси 1-қисми (транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш баданга ўртача оғир ёки оғир шикаст етказилишига сабаб бўлса) билан жиноят иши қўзғатилиб, тергов ҳаракатлари олиб борилмоқда.
Изоҳ (0)